Oʻzbekiston va Koreya hamkorligi doirasida xavfsiz turizm tajribasi oʻrganilmoqda
2026-05-29 09:15:00 / Yangiliklar
Oʻzbekiston Respublikasi Ichki ishlar vazirligi hamda Koreya xalqaro hamkorlik agentligi oʻrtasidagi ikki tomonlama hamkorlik doirasida Koreya Respublikasi delegatsiyasi Buxoro shahriga amaliy tashrif bilan keldi. Mazkur tashrif davlatlararo imzolangan kelishuvga asosan Ichki ishlar vazirligi Malaka oshirish institutida Simulyatsiyalashgan oʻquv markazini tashkil etish boʻyicha salohiyatni oshirish loyihasi doirasida amalga oshirilmoqda.
Tashrif dasturiga muvofiq xorijiy delegatsiya aʼzolari amaliy mashgʻulotlar uchun tegishli oʻquv dasturlarini ishlab chiqish maqsadida Buxoro viloyati IIB Xavfsiz turizmni taʼminlash boshqarmasi faoliyati bilan yaqindan tanishdilar. Uchrashuv davomida mehmonlar xavfsiz turizmni taʼminlash borasida Buxoroda amalga oshirilayotgan tizimli ishlar va xodimlar uchun xizmat joylarida yaratilgan zamonaviy sharoitlar hamda Buxoroning oʻziga xos qadimiy tarixiy qismini koʻzdan kechirib oʻrgandilar.
Ushbu uchrashuv kelgusida soha xodimlarining kasbiy malakasini xalqaro standartlar asosida yuksaltirishga va xavfsiz turizm yoʻnalishidagi faoliyatni yanada takomillashtirishga xizmat qilishi bilan ahamiyatli boʻldi.
Buxoro viloyati IIB Axborot xizmati