IIV rahbariyati tomondan Xorazm viloyatida “Qurbon hayiti” bayrami tadbirlarini yuqori saviyada tashkil etish, fuqarolar xavfsizligini taʼminlash hamda jamoat tartibini saqlash borasida amalga oshirilayotgan ishlar manzilli oʻrganildi
2026-05-26 23:00:00 / Yangiliklar
Xizmat safari davomida vazir oʻrinbosari viloyat ichki ishlar organlari masʼul rahbarlari hamrohligida Urganch shahrida joylashgan Oxunbobo jome masjidida boʻlib, Qurbon hayiti munosabati bilan oʻqiladigan hayit namozi jarayonlariga tayyorgarlik holati bilan yaqindan tanishdi.
Masjid hududida bayram kunlari minglab fuqarolar jam boʻlishini inobatga olgan holda, jamoat xavfsizligini taʼminlash, fuqarolarning erkin va xavfsiz harakatlanishi uchun yaratilgan sharoitlar, kirish-chiqish nazorati, texnik xavfsizlik tizimlari hamda huquq-tartibot organlari tomonidan tashkil etilgan xizmat jarayonlari atroflicha koʻzdan kechirildi.
Shuningdek, hayit namozi vaqtida xizmatga jalb etilgan ichki ishlar organlari, Milliy gvardiya va boshqa hamkor tuzilmalar shaxsiy tarkibining xizmatni tashkil etish darajasi, ularning shayligi va aholi bilan muomala madaniyatiga alohida eʼtibor qaratildi. Vazir oʻrinbosari tomonidan masʼul rahbarlarga fuqarolar xavfsizligini taʼminlash, ehtimoliy noxush holatlarning oldini olish hamda jamoat tartibini saqlash yuzasidan tegishli koʻrsatma va topshiriqlar berildi.
Xizmat safari davomida Urganch shahridagi aholi gavjum boʻladigan dam olish maskanlari, sayilgohlar va tungi vaqtda faoliyat yurituvchi hududlarda xizmat olib borayotgan ichki ishlar organlari xodimlarining faoliyati ham nazorat tartibida oʻrganildi.
Jumladan, tungi xizmatga jalb etilgan patrul-post naryadlarining xizmat olib borish sifati, hududlarda jamoat xavfsizligini taʼminlash boʻyicha amaliy harakatlari, profilaktik tadbirlarni tashkil etish darajasi tahlil qilindi. Xodimlarga xizmat davomida ogohlik va hushyorlikni yanada oshirish, aholi murojaatlariga tezkor va qonuniy munosabat bildirish boʻyicha aniq vazifalar yuklatildi.
Shu bilan birga, Qoʻriqlash xizmati faoliyati ham amaliy tarzda sinovdan oʻtkazildi. Tashvish tugmalari orqali shartli xabarlar berilib, tezkor harakatlanuvchi guruhlarning voqea joyiga yetib kelish tezligi, harakat algoritmi va xizmat shayligi tekshirildi. Oʻtkazilgan tekshiruvlar davomida shaxsiy tarkibning tayyorgarligi, tezkorligi va muvofiqlashtirilgan harakatlari alohida eʼtirof etildi.
Taʼkidlanganidek, Qurbon hayiti bayrami kunlarida aholiga munosib shart-sharoit yaratish, fuqarolarning osoyishta va xavfsiz ibodat qilishi hamda ommaviy tadbirlarni betalafot oʻtkazishni taʼminlash ichki ishlar organlarining ustuvor vazifalaridan biri hisoblanadi. Shu maqsadda Xorazm viloyati hududida barcha kuch va vositalar kuchaytirilgan tartibda xizmat olib bormoqda.