Ijtimoiy himoyaning amaliy samarasi: Toʻrt egizakning otasiga Ichki ishlar vazirligi tomonidan 3 xonali uy sovgʻa qilindi
2026-05-26 18:40:00 / Yangiliklar
Bugungi kunda mamlakatimizda olib borilayotgan islohotlar har bir soha qatori ichki ishlar organlari tizimida ham yaqqol namoyon boʻlmoqda. Ayniqsa, xodimlarning turmush sharoitini yaxshilash, ularni uy-joy bilan taʼminlash hamda ijtimoiy ragʻbatlantirish, farzandlarining sifatli taʼlim va tibbiy xizmatlardan foydalanish tizimi mutlaqo yangi bosqichga koʻtarildi.
Ana shunday cheksiz gʻamxoʻrlik va yuksak eʼtiborning navbatdagi hayotiy tasdigʻi Toshkent viloyati Ichki ishlar bosh boshqarmasida xizmat qilayotgan xodimning xonadoniga quvonch va baxt boʻlib kirdi.
Toshkent viloyati Ichki ishlar bosh boshqarmasi Yoʻl harakati xavfsizligi boshqarmasi Yoʻl-patrul xizmati batalyoni videokuzatuv guruhi kichik inspektor-operatori safdor Odiljon Abdullayevning xonadonida unutilmas, tarixiy voqea yuz berdi — qahramonimiz bir yoʻla 4 nafar egizak farzandning otasiga aylandi. Bu nafaqat bir oilaning, balki butun tizimning quvonchiga sabab boʻldi.
Farzandlar dunyoga kelishi munosabati bilan, baxtiyor oilaga Ichki ishlar vazirligi tomonidan yangi, zamonaviy 3 xonali xonadon kaliti sovgʻa qilindi.
Tizimda yaratilgan sharoitlar tufayli xodimga koʻrsatilgan bunday eʼtibor va kutilmagan tuhfa yurt osoyishtaligi yoʻlida tunu kun xizmat qilayotgan har bir xodimning koʻnglida davlatga, Vatanga va kasbiga boʻlgan sadoqatini yanada mustahkamlaydi.