Buxoro viloyati Ichki ishlar boshqarmasi boshligʻi olis Peshku tumanining 23-sonli umumtaʼlim maktabi bitiruvchilariga Prezident tabrigini yetkazdi
2026-05-26 17:55:00 / Yangiliklar
Peshku tumanidagi 23-umumtaʼlim maktabida 2026-yilning 25-may kuni bitiruvchilarga bagʻishlangan “Soʻnggi qoʻngʻiroq” tadbiri koʻtarinki ruhda boʻlib oʻtdi. Tantanali marosimda bitiruvchilar, ota-onalar, ustozlar hamda keng jamoatchilik vakillari jam boʻldi. Tadbirda Buxoro viloyati IIB boshligʻi faxriy mehmon sifatida ishtirok etdi.
Maktab hovlisining asosiy kirish qismida Oʻzbekiston Respublikasi Prezidentining sovgʻasi — “BYD Chazor” avtomashinasi joylashtirilgani bayram shukuhini yanada oshirib, barchaning eʼtiborini tortdi. Tadbir Davlat madhiyasi sadolari ostida ochiq deb eʼlon qilingach, Buxoro viloyati IIB boshligʻi soʻzga chiqib, dastlab Davlatimiz rahbarining bitiruvchilarga yoʻllagan tabrigini oʻqib eshittirdi. Oʻz nutqida u joriy yilda viloyat boʻylab 23 mingdan ziyod yoshlar maktabni yakunlab, mustaqil hayotga qadam qoʻyayotganini qayd etdi. Shuningdek, mamlakatimizda yoshlar masalasi davlat siyosatining eng ustuvor yoʻnalishlaridan biriga aylangani alohida taʼkidlandi.
Tadbirning eng hayajonli qismi taqdirlash marosimi boʻldi. Farzandi namunali xulq va aʼlo baholarga oʻqigan ota-onalarga hamda yoshlarni vatanparvarlik ruhida tarbiyalashda oʻrnak boʻlayotgan sinf rahbarlariga tashakkurnoma, kitoblar toʻplami va esdalik sovgʻalari taqdim etildi.
Shuningdek, maktab jamoasi uchun iftixorli boʻlgan yana bir yutuq alohida eʼtirof etildi. “Yosh kitobxon” tanlovining respublika bosqichida mutlaq gʻoliblikni qoʻlga kiritgan 6-sinf oʻquvchisi Nosirova Farzona Nasim qizi Buxoro viloyati IIB boshligʻi tomonidan faxriy yorliq va planshet bilan taqdirlandi. Uning muvaffaqiyatiga munosib hissa qoʻshgan ustoziga noutbuk, maktab direktoriga esa tashakkurnoma topshirildi. Qolaversa, gʻolibaning onasi Mehrigiyo Shirinova televizor bilan, otasi — Peshku tumani IIB profilaktika inspektori, mayor Nasim Bogʻiyev esa esdalik qoʻl soati bilan mukofotlandi.
Tantanali marosim oʻquvchilarning diltortar musiqiy va badiiy chiqishlariga ulanib ketdi, soʻngra esdalik uchun suratga tushildi. Yakunda mehmonlar maktab hududida barpo etilgan sohil voleyboli maydonchasi hamda kutubxona faoliyati bilan yaqindan tanishdilar. Bir soʻz bilan aytganda, bu yilgi “Soʻnggi qoʻngʻiroq” tadbiri bitiruvchilar qalbiga gʻurur va ishonch bagʻishlab, ularni buyuk kelajak sari ruhlantiruvchi yorqin lahzalarga boy boʻldi.
Buxoro viloyati IIB Axborot xizmati