O‘zbеkiston Rеspublikаsi Ichki ishlаr vаzirligi

Prezidentimizning mahallalarda xavfsiz muhitni yaratishga qaratilgan qarori “inson qadri uchun” degan tamoyil asosida amalga oshirilayotgan izchil islohotlarning amaliy natijadorligiga xizmat qilmoqda.

Ichki ishlar vazirligi Akademiyasi boshligʻi Rustam Xatamov Toshkent viloyatining Chirchiq shahrida boʻlib, “Yoshlik”, “Birlik”, “Nur” va “Mirzo Gʻolib” mahallalarining kriminogen vaziyati bilan tanishdi.

Maʼlumki, mazkur mahallalar soʻnggi uch yildan buyon “qizil” toifada qolayotgan edi. Qaror ijrosini taʼminlash maqsadida akademiya professor-oʻqituvchilaridan iborat ishchi guruhlar tomonidan mahallalarda keng qamrovli ishlar amalga oshirildi.

Joylarga chiqqan holda jinoyatchilik omillari ilmiy-amaliy yondashuvlar asosida oʻrganilib, ularni bartaraf etishga qaratilgan taklif va tavsiyalar ishlab chiqildi. Manzilli “yoʻl xarita”lar shakllantirilib, ijroga qaratildi.

Mahallalarda 80 ta tashvish tugmasi, 10 dan ortiq zamonaviy kamera va boshqa vositalar oʻrnatildi. “Jinoyat oʻchoqlari”, jamoat joylari va huquqbuzarlik sodir boʻlishi mumkin boʻlgan hududlarda qoʻshimcha patrullik yoʻnalishlari tashkil qilinib, 30 dan ortiq obyekt texnik qoʻriqlovga olindi.

Xonadonlarni manzilli oʻrganish davomida ijtimoiy-maishiy muammosi bor shaxslar aniqlanib, “mahalla yettiligi”ga biriktirildi. Shu kabi tizimli ishlar samarasida “Yoshlik” va “Mirzo Gʻolib” mahallalarida joriy yilning oʻtgan 4 oyi mobaynida birorta ham jinoyat sodir etilishiga yoʻl qoʻyilmagan boʻlsa, “Nur”, “Birlik” mahallalari “sariq” toifaga oʻtkazildi.

Akademiya boshligʻi mahallalarni oʻrganish jarayonida faollar bilan muloqot qildi. Kriminogen vaziyatga eng koʻp salbiy taʼsir koʻrsatayotgan omillar, oilalardagi muhit, aholini qiynayotgan ijtimoiy muammolar, “mahalla yettiligi”ning faoliyati, ijtimoiy profilaktika va boshqa yoʻnalishda amalga oshirilayotgan tadbirlar yuzasidan fikr almashdi.

– Inson manfaatlarini taʼminlash faoliyatimizning asosiy mezoni sanaladi. Buning uchun, avvalo, odamlar bilan doimiy muloqot qilishimiz, ularning hayotiy muammosi va dardu tashvishini his qilishimiz kerak. Muhtaram Prezidentimiz belgilab bergan ustuvor vazifalar, yaxlit tizim asosida ishlashning bosh maqsadi ham shu – mahallalarda chinakam xavfsiz muhitni yaratish orqali aholi roziligiga erishishdir, – dedi akademiya boshligʻi.

Uchrashuvlar chogʻida profilaktika ishlarini yanada kuchaytirish, mahallalarda huquqbuzarliklarning barvaqt oldini olish, yechimini kutayotgan masalalarni joyida ijobiy hal etish, yoshlar va ayollar muammolariga manzilli yondashish, nizoli oilalarda sogʻlom muhitni qaror toptirish zarurligi taʼkidlandi.

“Mahalla yettiligi” vakillari hamda masʼullarning takliflari tinglanib, aniq vazifalar belgilab olindi.

IIV Akademiyasi Axborot xizmati