Ichki ishlar vaziri oʻrinbosarining Buxoro viloyatiga tashrifi: xavfsizlik va yoshlar maʼnaviyati eʼtiborda
2026-05-26 11:25:00 / Yangiliklar
Oʻzbekiston Respublikasi Ichki ishlar vazirining oʻrinbosari, polkovnik D.N. Sattarov Qurbon hayiti bayrami oldidan Buxoro viloyatiga tashrif buyurib, hududda bayramni koʻtarinki ruhda va osoyishta oʻtkazish boʻyicha koʻrilayotgan tayyorgarlik ishlari bilan yaqindan tanishdi.
Tashrif avvalida vazir oʻrinbosari Buxoro viloyati IIB Tezkor boshqaruv markazida boʻldi. Asosiy maqsad, bayram kunlari jamoat xavfsizligini taʼminlashga jalb etilgan kuch va vositalarning toʻgʻri taqsimlanganligini hamda ehtiyot choralarini koʻzdan kechirishdan iborat boʻldi. Markazda masʼullar tomonidan jamoat tadbirlari boʻlib oʻtadigan barcha hududlar toʻliq kameralashtirilganligi va doimiy kuzatuv nazoratiga olinganligi yuzasidan batafsil taqdimot namoyish etildi. Xususan, fuqarolarimiz masjidlarda hayit namozini tinch va xotirjam ado etishlari uchun barcha zaruriy xavfsizlik choralari koʻrilganligi alohida taʼkidlandi.
Shundan soʻng, tashrif doirasidagi tadbirlar qadimiy Buxoroning “Eski shahar“ qismida davom etdi. Bu yerda Buxoro viloyati hokimi boshchiligida oʻtkazilgan “Yosh kitobxon“ koʻrik-tanlovi gʻoliblarini taqdirlash marosimi boʻlib oʻtdi. Tadbirda bilimli va iqtidorli yoshlarning erishgan yutuqlari yuksak eʼtirof etilib, munosib taqdirlandi. Yigʻilgan barcha yoshlarga kelgusida ana shunday yuqori natijalarga erishishlari va yurtimiz ravnaqiga hissa qoʻshishlari yoʻlida samimiy tilaklar bildirildi.
Tadbir yakunida polkovnik D.N. Sattarov Buxoro viloyati IIB boshligʻi hamrohligida “Eski shahar“ hududida xizmat olib borayotgan ichki ishlar organlari xodimlarining kundalik xizmat faoliyati bilan tanishdi. Xodimlarga bayram kunlarida fuqarolar xavfsizligini taʼminlash, sayyohlar va mahalliy aholiga sifatli xizmat koʻrsatish hamda doimiy hushyorlikni saqlash boʻyicha tegishli koʻrsatmalar berildi.
Buxoro viloyati IIB Axborot xizmati