Qidiruvda boʻlgan shaxs Amerika Qoʻshma Shtatlaridan Oʻzbekistonga qaytarildi
2026-05-25 09:00:00 / Yangiliklar
Oʻzbekiston Respublikasi Ichki ishlar vazirligi Tezkor-qidiruv departamenti tomonidan Amerika Qoʻshma Shtatlari huquq-tartibot idoralari hamda AQSHning Toshkentdagi Elchixonasi bilan hamkorlikda mamlakatimizda jinoyat sodir etib, xorijda yashirinib yurgan shaxslarni aniqlash, ushlash va Oʻzbekistonga qaytarish borasidagi ishlar izchil davom ettirilmoqda.
Amaliy hamkorlikning navbatdagi natijasi sifatida Oʻzbekiston Respublikasi Jinoyat kodeksining 276-moddasi 2-qismida nazarda tutilgan jinoyatni sodir etganlikda ayblanib, 2023-yilda qidiruv eʼlon qilingan 1989-yilda tugʻilgan Oʻzbekiston fuqarosi Amerika Qoʻshma Shtatlarining Nyu-York shahrida aniqlanib, ushlandi hamda belgilangan tartibda Oʻzbekiston Respublikasiga deportatsiya qilindi.
Ichki ishlar organlari tomonidan jinoyat sodir etib, tergov va sud organlaridan yashirinib yurgan shaxslarni aniqlash, ularning qayerda boʻlishidan qatʼi nazar javobgarlikka tortilishini taʼminlash maqsadida xalqaro hamkorlik doirasida tezkor-qidiruv tadbirlari izchil davom ettirilmoqda.