Sirdaryo viloyati Ichki ishlar boshqarmasida “Soʻnggi qoʻngʻiroq” tadbirlari va “Qurbon hayiti” bayrami kunlarida jamoat xavfsizligini taʼminlash hamda huquqbuzarliklarning oldini olishga bagʻishlangan tezkor yigʻilish oʻtkazildi
2026-05-25 10:00:00 / Yangiliklar
Videokonferensaloqa tizimi orqali tashkil etilgan mazkur yigʻilishda viloyat prokuraturasi, Davlat xavfsizlik xizmati, ichki ishlar organlari, Milliy gvardiya, Favqulodda vaziyatlar boshqarmalari rahbariyati, barcha huquqni muhofaza qiluvchi organlar masʼul xodimlari hamda boshqa tegishli idora va tashkilotlar mutasaddilari ishtirok etdi.
Shuningdek, hududiy studiyalar orqali shahar-tuman huquq-tartibot organlari rahbarlari va masʼul tashkilot vakillari ham yigʻilishga ulandi.
Yigʻilish davomida “Soʻnggi qoʻngʻiroq” tadbirlarini yuqori saviyada, xavfsiz va tartibli tashkil etish, umumtaʼlim muassasalari atrofida jamoat tartibini saqlash, oʻquvchi-yoshlar xavfsizligini taʼminlash, yoʻl harakati xavfsizligini kuchaytirish hamda turli noxush holatlarning oldini olish masalalari atroflicha muhokama qilindi.
Shu bilan birga, “Qurbon hayiti” bayrami kunlarida aholi gavjum joylar, masjidlar, ziyoratgohlar, bozorlar va dam olish maskanlarida xavfsizlik choralarini yanada kuchaytirish, jamoat tartibini saqlash, transport harakatini tartibga solish, tezkor xizmatlar hamkorligini mustahkamlash boʻyicha aniq vazifalar belgilab berildi.
Masʼullarga bayram va tadbir kunlarida kuchaytirilgan tartibda xizmat olib borish, profilaktik tadbirlarni samarali tashkil etish, fuqarolar murojaatlariga tezkor munosabat bildirish hamda har qanday favqulodda holatlarning oldini olish yuzasidan qatʼiy topshiriqlar berildi.
Yigʻilish yakunida barcha mutasaddi tashkilotlar oʻrtasida hamkorlikni yanada kuchaytirish, aholi osoyishtaligi va xavfsizligini taʼminlash borasida muvofiqlashtirilgan chora-tadbirlarni izchil amalga oshirish muhim ekani alohida taʼkidlandi.
Sirdaryo viloyati IIB Axborot xizmati