IIV rahbariyati Xalqaro gullar festivalida jamoat tartibi va xavfsizlikni taʼminlash boʻyicha kompleks chora-tadbirlar tashkil etilishini oʻrganmoqda
2026-05-24 14:00:00 / Yangiliklar
Ichki ishlar vazirining birinchi oʻrinbosari – Jamoat xavfsizligi departamenti boshligʻi general-mayor Rustam Djurayev “65- Xalqaro gullar festivali” davomida jamoat tartibi va fuqarolar xavfsizligini taʼminlash yuzasidan koʻrilgan chora-tadbirlarni oʻrganish maqsadida Namangan viloyatiga tashrif buyurdi.
Festival davomida Ichki ishlar vazirligi tomonidan Milliy gvardiya va boshqa huquqni muhofaza qiluvchi organlar bilan hamkorlikda belgilangan tadbirlar oʻtkaziladigan hududlarda jamoat tartibini taʼminlash, ishtirokchilar va mehmonlar xavfsizligini saqlash boʻyicha kompleks chora-tadbirlar amalga oshirilmoqda. Tadbirga 1 millionga yaqin xorijiy sayyohlar hamda respublikaning barcha hududlaridan 7 million nafarga yaqin yurtdoshlarimizning tashrif buyurishi kutilmoqda.
Jumladan, festival boʻlib oʻtayotgan Namangan shahrining Bobur nomidagi bogʻida navbatchilik asosida tibbiy postlar, adashib qolgan bolalar uchun punktlar hamda Milliy gvardiya punktlari tashkil etilgan boʻlib, fuqarolar favqulodda holatlarda mazkur joylarga murojaat qilishlari mumkin.
Festival ochilish kuni “Namangan” aeroportidan Bobur bogʻigacha qariyb 200 ta avtomashina ishtirokida avtoparad boʻlib oʻtadi. Uzunligi 14 kilometrni tashkil etuvchi gullar bilan bezalgan avtokarvon harakati yoʻnalishi boʻylab YHXX, PPX va Milliy gvardiya xodimlari xizmat olib bormoqda.
Umuman olganda, 50 kun davom etadigan festival doirasida 150 dan ortiq madaniy, maʼrifiy va koʻngilochar tadbirlar oʻtkazilishi rejalashtirilgan.
Shuningdek, tadbir hududi atrofidagi kuzatuv kameralari Namangan viloyati IIB Situatsion markaziga integratsiya qilinib, shu yerning oʻzida festival davomida tinch va xavfsiz muhitni taʼminlashga jalb etilgan kuch va vositalar faoliyati muvofiqlashtirilgan.
IIV Jamoat xavfsizligi departamenti Axborot xizmati