Toshkent shahar Ichki ishlar bosh boshqarmasi tashabbusi bilan tashkil etilgan “Xavfsiz oila” profilaktik loyihasining navbatdagi bosqichi yakunlandi
2026-05-24 12:50:00 / Yangiliklar
Loyiha doirasida oila-turmush doirasidagi huquqbuzarliklarning oldini olish, ehtiyojmand oilalarni qoʻllab-quvvatlash hamda voyaga yetmaganlarni ijtimoiy moslashtirishga qaratilgan chora-tadbirlar amalga oshirildi.
Tadbirlarga 19 ta oila va 20 nafar voyaga yetmagan bola jalb qilinib, ular bilan psixologik, tibbiy va ijtimoiy ishlar olib borildi. Bolalar uchun maʼnaviy-maʼrifiy uchrashuvlar, harbiy-vatanparvarlik mashgʻulotlari, ekskursiyalar hamda sport va kasb-hunar yoʻnalishidagi amaliy tadbirlar tashkil etildi.
Loyiha doirasida ishtirokchilarning bandligini taʼminlash, ijtimoiy himoyasini kuchaytirish va turmush sharoitini yaxshilashga ham alohida eʼtibor qaratildi. Xususan, ayrim ishtirokchilarga ID-kartalar rasmiylashtirildi, ehtiyojmand oilaga amaliy yordam koʻrsatildi, ayollarning bandligi taʼminlandi.
“Xavfsiz oila” loyihasining yakuniy tadbiri tantanali ruhda oʻtkazilib, ishtirokchilarga sertifikatlar, sport anjomlari va esdalik sovgʻalari topshirildi. Tadbir bolalarda vatanparvarlik, maʼnaviy qadriyatlarga hurmat va jamiyatda munosib oʻrin egallash kabi fazilatlarni mustahkamlashga xizmat qildi.
Toshkent shahar IIBB Axborot xizmati