Ichki ishlar vazirligi Akademiyasi magistratura tinglovchilari uchun tergov sifatini oshirish va raqamlashtirishga bagʻishlangan ochiq muloqot oʻtkazildi
2026-05-24 12:25:00 / Yangiliklar
Ichki ishlar vazirining oʻrinbosari — Tergov departamenti boshligʻi Ramazon Ashropov akademiya magistraturasi tinglovchilari uchun mashgʻulot oʻtdi.
Ochiq muloqot tarzida oʻtgan mashgʻulotda tergov sifatini oshirish, sohani raqamlashtirish, aholi murojaatlari bilan ishlash, ularning muammolarini hal qilish borasida departament va uning quyi boʻlinmalari tomonidan amalga oshirilayotgan ishlar tahlil qilindi.
Ramazon Ashropov dastavval sohadagi keng qamrovli islohotlarga toʻxtaldi. Ichki ishlar organlarini xalqchil tuzilma sifatida shakllantirish jarayonida jinoyatlarni tergov qilish faoliyatini tubdan takomillashtirish, fuqarolarning huquqlari, erkinliklari va qonuniy manfaatlarini ishonchli himoya qilishni taʼminlash, tizim xodimlarining kasbiy mahoratini oshirishga alohida eʼtibor qaratilayotgani taʼkidlandi.
Mashgʻulotda sohadagi ayrim muammolar, xususan, tergov jarayonida yoʻl qoʻyilgan protsessual xato va kamchiliklar ham aytib oʻtildi. Shuningdek jinoyat ishlarini qisqa muddatda, sifatli va tezkor tergov qilish maqsadida amaliyotga tatbiq qilingan “Surxondaryo tajribasi” taqdimot qilindi. Mazkur tajriba oʻzining ijobiy natijasini koʻrsatayotgani, bugungi kunda tizimni boshqa hududlarda ommalashtirish borasida izchil chora-tadbirlar amalga oshirilayotgani qayd etildi.
Zamonaviy rahbarlik boʻyicha taʼlim olayotgan tinglovchilarga sohaga raqamli yondashuvlarni tatbiq qilish, tergovchi va surishtiruvchilarning kunlik xizmat faoliyatini samarali tashkil etish, ijrochilik intizomini mustahkamlash, tergov sifatini yanada oshirish boʻyicha amaliy tavsiya va dolzarb vazifalar yetkazildi.
IIV akademiyasi Axborot xizmati