IIV Akademiyasi rahbariyati tomonidan poytaxtimizning Sergeli tumanida xavfsiz muhitni shakllantirish borasida amalga oshirilayotgan ishlar oʻrganildi
2026-05-23 20:25:00 / Yangiliklar
Maʼlumki, tuman mahallalariga IIV Akademiyasi hamda Bojxona instituti professor-oʻqituvchilari jalb qilingan. Ishchi guruhlar tomonidan kriminogen vaziyatga salbiy taʼsir koʻrsatayotgan omillar ilmiy-amaliy yondashuvlar asosida oʻrganilib, jinoyatchilikni bartaraf etish choralari koʻrilmoqda.
Oʻrganishlar davomida shu kungacha mahallalar hududida 20 dan ortiq “jinoyat oʻchoqlari” aniqlandi. Jamoat xavfsizligini taʼminlash va huquqbuzarliklarning barvaqt oldini olish maqsadida joylarga zamonaviy kameralar, “SOS” tashvish tugmalari va boshqa vositalar oʻrnatildi.
Jinoyat sodir etilishi mumkin boʻlgan chekka va aholi gavjum hududlarga qoʻshimcha kuch-vositalar yoʻnaltirildi. Ijtimoiy profilaktika obyektlari, alohida toifadagi va “xavf guruhi”dagi shaxslar roʻyxati shakllantirilib, “mahalla yettiligi”ga biriktirildi. Mahallalarda xavfsiz koʻcha va uylar tashkil etildi.
Akademiya boshligʻi Rustam Xatamov “Soʻgʻdiyona” mahallasida boʻlib, kriminogen vaziyat taqdimoti bilan tanishdi. Masʼullarning axborotini tinglab, huquqbuzarlik sodir etishga moyil boʻlgan shaxslar bilan alohida ishlash, oilalardagi ijtimoiy-maishiy muammolarni oʻrganish, aholi oʻrtasida profilaktik tadbirlarni kuchaytirish yuzasidan koʻrsatmalar berdi.
Manzilli oʻrganishlar “Nurhayot” mahallasida davom ettirildi. Huquq-tartibot maskanida mutasaddi rahbarlar, “mahalla yettiligi” va ishchi guruhlar bilan birgalikda “poytaxt namunasi”ni keng joriy etishga qaratilgan ishlar muhokama qilindi.
Muloqot chogʻida qayd etilayotgan jinoyatlar, ularning asl omillari, xonadonlardagi muhit, aholining bandlik darajasi, yoshlar va xotin-qizlar bilan ishlash, hududlarni kameralashtirish hamda kriminogen vaziyatga bevosita taʼsir koʻrsatuvchi boshqa omillar atroflicha tahlil qilindi.
Akademiya boshligʻi oila-turmush doirasida hamda yoshlar tomonidan sodir etilayotgan huquqbuzarliklarga eʼtibor qaratdi. Mahallada xavfsiz muhitni shakllantirishda manfaatdor idora va tashkilotlarning hamkorlikdagi masʼuliyatini oshirish, profilaktika tadbirlarida har bir xonadon va u yerda yashayotgan fuqarolarni qamrab olish, bu borada “mahalla yettiligi”ning imkoniyatlaridan samarali foydalanish zarurligini taʼkidladi.
Shu kuni dolzarb yoʻnalishlar boʻyicha qoʻshimcha chora-tadbirlar belgilab olindi.
IIV Akademiyasi Axborot xizmati