Maʼnaviy-maʼrifiy tadbir doirasida IIV ayol xodimlari Islom sivilizatsiyasi markazida boʻldi
2026-05-23 18:30:00 / Yangiliklar
IIV Maʼnaviy-maʼrifiy ishlar va kadrlar bilan taʼminlash departamenti tashabbusi bilan vazirlik Markaziy apparati hamda sohaviy xizmatlarda faoliyat yuritayotgan 50 nafar ayol xodim uchun maʼnaviy-maʼrifiy tadbir tashkil etildi.
Tadbir doirasida xodimlar Oʻzbekistondagi Islom sivilizatsiyasi markazi faoliyati bilan yaqindan tanishdi. Tashrif davomida markazdagi noyob qoʻlyozmalar, qadimiy eksponatlar, tarixiy manbalar hamda buyuk ajdodlarimizning boy ilmiy-maʼrifiy merosi katta qiziqish bilan koʻzdan kechirildi.
Ishtirokchilarga yurtimizdan yetishib chiqqan buyuk allomalarning jahon ilm-fani va sivilizatsiyasi rivojiga qoʻshgan ulkan hissasi, ularning bebaho ilmiy merosi haqida batafsil maʼlumot berildi.
Tadbir ishtirokchilarida katta taassurot qoldirdi. Xususan, IIV Jazoni ijro etish departamenti xodimi, kapitan Hadicha Oʻtayevaning taʼkidlashicha, markazdagi tarixiy manbalar va eksponatlar orqali ilgari kitoblarda oʻqigan, eshitgan maʼlumotlarni zamonaviy texnologiyalar yordamida jonli tarzda koʻrish imkoniyati yanada katta qiziqish uygʻotgan.
— Bu yerda ajdodlarimizning boy ilmiy merosi zamonaviy yondashuvlar asosida namoyish etilgani kishini faxrlantiradi. Tarixda oʻqigan voqealar va allomalarimiz hayoti goʻyoki koʻz oʻngimizda jonlangandek boʻldi, — deydi u.
Bunday maʼnaviy-maʼrifiy tadbirlar ichki ishlar organlari xodimlarining dunyoqarashini kengaytirish, milliy qadriyatlarga hurmat ruhini mustahkamlash hamda boʻsh vaqtini mazmunli tashkil etishda muhim ahamiyat kasb etmoqda.