IIV Akademiyasi rahbariyati tomonidan mahallalardagi kriminogen vaziyat tanqidiy-tahliliy koʻrib chiqildi
2026-05-22 09:00:00 / Yangiliklar
Bu borada amalga oshirilayotgan keng qamrovli islohotlarda aholi muammolariga manzilli yondashish, jinoyatchilikning barvaqt oldini olish, profilaktika ishlari samaradorligini oshirish, hududlarda xavfsiz muhitni yaratishga alohida eʼtibor qaratilmoqda.
Ichki ishlar vazirligi Akademiyasi boshligʻi Rustam Xatamov “poytaxt namunasi” asosida olib borilayotgan ishlar bilan yaqindan tanishish maqsadida Mirobod tumanining “Tong yulduzi” va “Qoʻyliq ota” mahallalarida boʻldi.
Oʻrganishlar davomida mahallalarning kriminogen vaziyati, aholi, ayniqsa yoshlar oʻrtasida huquqbuzarliklarning barvaqt oldini olish, jinoyatchilik omillari, “102” tizimi orqali kelib tushayotgan murojaatlar, hududlarni texnik va jismoniy qoʻriqlovga olish masalalari muhokama qilindi.
Qayd etilishicha, “Tong yulduzi” mahallasida 2137 ta oila istiqomat qilib, profilaktik va probatsiya hisobida turuvchi 150 nafardan ortiq shaxslar mavjud.
Keyingi paytlarda oldini olish mumkin boʻlgan jinoyatlardan oʻgʻirlik koʻp qayd etilgan boʻlib, ularning aksariyati savdo doʻkonlari, xonadonlar, temir yoʻl vokzali hududida sodir qilingan.
Masʼullar, “mahalla yettiligi” vakillari va akademiya magistraturasi tinglovchilari bilan uchrashuv chogʻida mahallaning kriminogen vaziyatiga salbiy taʼsir koʻrsatayotgan omillarni bartaraf etish, hududlarda xavfsizlik choralarini kuchaytirish, profilaktik ishlarni manzilli tashkil qilish, fuqarolarning huquqiy masʼuliyati va ogohligini oshirish, “jinoyat oʻchoqlari”ga barham berish zarurligi qayd etildi.
Shunday soʻng akademiya boshligʻi “Qoʻyliq ota” mahallasi vakillari bilan uchrashdi. Muhokama jarayonida huquqbuzarliklarning barvaqt oldini olish boʻyicha “mahalla yettiligi” tizimi bilan hamkorlikda amalga oshirilishi lozim boʻlgan qator vazifalar borligi maʼlum boʻldi.
Xususan, huquqbuzarlik sodir etganlar orasida alohida toifadagi shaxslar salmogʻi yuqori ekanligi, oldini olish mumkin boʻlgan jinoyatlarning koʻpi boshqa hududdan kelgan fuqarolar tomonidan sodir etilayotganini inobatga olib, mazkur yoʻnalishda profilaktik ishlarni jadallashtirish lozimligi aytildi.
Tizim samaradorligini oshirish uchun har bir jinoyatning oqibatiga emas, balki uning kelib chiqish sabablarini barvaqt aniqlashga eʼtibor qaratish kerakligi taʼkidlandi.
Bundan tashqari, masʼullarga kundalik faoliyatni tahlil qilib borish, ijtimoiy profilaktikani samarali tashkil qilish, kriminogen vaziyati ogʻir hududlar va aholi gavjum joylarga qoʻshimcha kuch-vositalarni yoʻnaltirish, fuqarolar bilan doimiy muloqotda boʻlish yuzasidan topshiriq berildi.
Manzilli oʻrganishlar davomida xavfsiz muhitni shakllantirishda yoʻl qoʻyilgan kamchiliklar tanqidiy-tahliliy koʻrib chiqilib, kelgusidagi ustuvor vazifalar belgilab olindi.
IIV Akademiyasi Axborot xizmati