IIV Akademiyasi rahbariyati tomonidan “Poytaxt namunasi” asosida mahallalarda xavfsiz muhit yaratish boʻyicha amalga oshirilayotgan ishlar oʻrganildi
2026-05-21 16:15:00 / Yangiliklar
Ichki ishlar vazirligi Akademiyasi boshligʻi Rustam Xatamov taʼlim muassasasiga biriktirilgan mahallalarda “poytaxt namunasi” asosida erishilayotgan natijalar bilan tanishdi.
Dastlabki manzil “Charx Kamolon — 2” mahallasi boʻldi. Shu yerning oʻzida “jinoyat oʻchoq”lariga barham berish, xavfsizlik choralarini kuchaytirish, huquqbuzarliklarning barvaqt oldini olish, ijtimoiy profilaktika samaradorligini oshirish va boshqa yoʻnalishda amalga oshirilayotgan ishlar muhokama qilindi. Jinoyatchilik omillari tahlil qilinib, mahallani jinoyatdan xoli hududga aylantirish borasida aniq vazifalar belgilab olindi.
Shundan soʻng “Botirma” mahallasining kriminogen vaziyati oʻrganildi. Masʼullar tomonidan poytaxt ahli va mehmonlari uchun xavfsiz muhit yaratish maqsadida koʻrilayotgan chora-tadbirlar, amaliyotga joriy qilingan tajribalar taqdimot qilindi.
Qayd etilishicha, mahalladagi 2380 ta xonadonda 6 mingdan ziyod aholi istiqomat qiladi. Hududda umumtaʼlim maktabi, yirik savdo majmuasi, maktabgacha taʼlim muassasalari hamda boshqa maishiy xizmat koʻrsatuvchi maskanlar bor. Mahallaning kriminogen vaziyatiga eng koʻp salbiy taʼsir koʻrsatayotgan omil sifatida oʻgʻirlik jinoyati qayd etilgan.
Oʻrganishlar davomida 8 ta “jinoyat oʻchogʻi”, 42 nafar ijtimoiy profilaktika obyekti, 8 nafar “xavf guruhi”dagi shaxs aniqlangan. Koʻchalar, koʻp qavatli uylar, koʻngilochar maskanlar va huquqbuzarlik sodir etilishi mumkin boʻlgan boshqa joylarga videokuzatuv kameralari, tashvish tugmalari oʻrnatilib, xavfsizlik tizimlariga integratsiya qilingan. “Xavf guruhi”dagi shaxslar va ijtimoiy-maishiy muammosi bor oilalar roʻyxati shakllantirilib, “mahalla yettiligi”ga yoʻnaltirilgan.
Akademiya boshligʻi hududlarni texnik qoʻriqlovga olishni jadallashtirish, aholi murojaatlari bilan tizimli ishlash, profilaktika ishlarini kuchaytirish orqali jinoyatchilikni keskin kamaytirish yuzasidan topshiriq berdi.
Taʼlim muassasasi vakillari shu kuni “Mehrjon” mahallasida ham boʻlib, kriminogen vaziyatni barqaror saqlash, jamoat xavfsizligini taʼminlash, “102” tizimi orqali kelib tushgan murojaatlarni qabul qilish, fuqarolarning huquqiy madaniyatini oshirish, yoshlar oʻrtasida huquqbuzarliklarning barvaqt oldini olish, shuningdek hududlarga jalb qilingan kuch-vositalar faoliyatini oʻrgandi.
Oʻrganishlar yakunida “poytaxt namunasi”ni samarali joriy qilish boʻyicha bir qator chora-tadbirlar belgilab olindi.
IIV Akademiyasi Axborot xizmati