Buxoro viloyati IIB boshligʻi tomonidan Buxoro tumanida oʻtkazilgan sayyor qabulda qator murojaatlar ijobiy hal etildi
2026-05-20 17:35:00 / Yangiliklar
Joriy yilning 20-may kuni Buxoro tumani “Shergiron” MFY binosida Buxoro viloyati IIB boshligʻi ishtirokida navbatdagi sayyor qabul oʻtkazildi. Jismoniy va yuridik shaxslar, shuningdek, viloyat ichki ishlar organlari xodimlari uchun tashkil etilgan ushbu ochiq muloqot xalq dardi bilan yashashning yorqin amaliy ifodasi boʻldi.
Ushbu jarayonda har bir masalaga inson taqdiri nuqtai nazaridan yondashilib, aholining qonuniy manfaatlarini taʼminlash va huquqlarini himoya qilish bosh maqsad qilib olindi. Samimiy ruhda kechgan tadbirda 15 ga yaqin fuqaroning sud-huquq va kundalik turmush bilan bogʻliq murojaatlari batafsil eshitildi. Bu muloqot maydoni odamlarni bezovta qilayotgan turli ijtimoiy va maishiy muammolarga qonuniy va tezkor yechim topish imkonini berdi.
Qabulga kelganlarning aksariyati hududlarda yoʻl harakati xavfsizligini taʼminlash, xususan, aholi gavjum hududlarda svetofor va piyodalar oʻtish joylarini oʻrnatish boʻyicha oʻz taklif hamda murojaatlarini bildirdilar. Shuningdek, fuqarolar tomonidan ishga kirish masalalari, probatsiya hisobida turuvchi shaxslarni ijtimoiy qoʻllab-quvvatlash va ularning bandligini taʼminlash kabi muhim ijtimoiy muammolar koʻtarildi. Bundan tashqari surishtiruv hamda dastlabki tergov jarayonlarining xolisligini taʼminlashga oid eʼtirozlar hamda kundalik turmushda uchraydigan boshqa turli masalalar chuqur tahlil qilinib, ularga huquqiy tushuntirishlar berildi.
Muloqotning eʼtiborli tomoni shundaki, bildirilgan muammolarning aksariyati boshqarma boshligʻining aralashuvi bilan shu yerning oʻzida ijobiy hal etildi. Qoʻshimcha oʻrganish va huquqiy baho berish talab etiladigan murakkab holatlar yuzasidan tegishli sohaviy xizmat rahbarlariga aniq topshiriqlar berilib, ularning ijrosi alohida nazoratga olindi.
Ochiqlik va shaffoflik prinsiplari asosida tashkil etilgan bu kabi sayyor qabullar inson huquqlarini himoya qilishning amaliy namunasi hisoblanib, xalq hamda davlat idoralari oʻrtasidagi ishonchni yanada mustahkamlashga xizmat qilishi bilan ahamiyatlidir