Xorazm viloyati IIB rahbariyati tomonidan Xiva shahrida kriminogen vaziyatni barqarorlashtirish borasida yigʻilish oʻtkazildi
2026-05-19 10:00:00 / Yangiliklar
Joriy yilning 18-may kuni Xiva shahar hokimligida huquq-tartibotni mustahkamlash, jinoyatchilikka qarshi kurash samaradorligini yanada oshirishga qaratilgan kengaytirilgan yigʻilish boʻlib oʻtdi.
Unda shahar Kengashi deputatlari, huquqni muhofaza qiluvchi va nazorat organlari rahbarlari, shuningdek jamoatchilik vakillari ishtirok etdi.
Yigʻilishda tashkiliy masala koʻrib chiqilib, Ichki ishlar vazirining tegishli buyrugʻiga asosan Bogʻot tumani IIB boshligʻi lavozimida faoliyat yuritib kelgan podpolkovnik Ergash Axmedov Xiva shahar ichki ishlar boʻlimi boshligʻi lavozimiga tayinlanganligi rasman eʼlon qilindi.
Mazkur tayinlov shaharda jamoat xavfsizligini taʼminlash, jinoyatchilikka qarshi kurashish tizimini yanada takomillashtirishga qaratilgan tashkiliy qaror sifatida baholandi.
Yigʻilishda soʻz olgan Xorazm viloyati IIB boshligʻi, polkovnik Abdumajid Shermuxamedov tomonidan shahardagi kriminogen vaziyat atroflicha tahlil qilindi.
Xususan, jinoyat va huquqbuzarliklarning sabab va omillari, ularni barvaqt oldini olish boʻyicha amalga oshirilayotgan ishlar, profilaktika tadbirlarining samaradorligi hamda bu boradagi mavjud muammolar atroflicha koʻrib chiqildi.
Shu bilan birga, jamoat xavfsizligini taʼminlashda sohaviy xizmatlar oʻrtasidagi hamkorlikni kuchaytirish, mahallabay ishlash tizimini yanada rivojlantirish yuzasidan aniq vazifalar belgilab berildi.
Oʻz navbatida, Xiva shahar hokimi Temurbek Davletov soʻzga chiqib, ilgari shahar ichki ishlar boʻlimi boshligʻi lavozimida xizmat qilgan podpolkovnik Botir Otajanovning jinoyatchilikka qarshi kurashish, aholi tinchligi va osoyishtaligini taʼminlash borasidagi fidokorona mehnatini alohida eʼtirof etdi.
U shahar aholisi nomidan Botir Otajanovga samimiy minnatdorchilik bildirib, kelgusi faoliyatida muvaffaqiyatlar tiladi.
Shu bilan birga, yangi tayinlangan rahbar — Ergash Axmedov zimmasiga yuklatilgan vazifalarga toʻxtalib oʻtilib, unga ish faoliyatida omad va yuqori natijalar tilab qolindi.
Taʼkidlanganidek, yangi rahbardan jinoyatlarning barvaqt oldini olish, huquqbuzarliklarni kamaytirish, aholi bilan ochiq muloqotni yoʻlga qoʻyish va zamonaviy profilaktika mexanizmlarini joriy etish borasida aniq natijalar kutiladi.
Yigʻilish yakunida muhokama qilingan masalalar yuzasidan tegishli qarorlar qabul qilinib, masʼul idoralar rahbarlariga aniq topshiriqlar berildi. Ularning ijrosini taʼminlash yuzasidan qatʼiy nazorat oʻrnatilishi belgilandi.
Xorazm viloyati IIB Axborot xizmati