Toshkent shahar Yangihayot tumanida amalga oshirilayotgan ishlar muhokama qilindi
2026-05-18 11:20:00 / Yangiliklar
Mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan Prezident Qarorining ijrosi yuzasidan joylarda oʻrganish ishlari davom etmoqda. Yangihayot tumanida boʻlib oʻtgan uchrashuvda mana shu mavzu keng muhokama qilindi. Unda poytaxt IIBB boshligʻi, prokurori, Milliy Gvardiya Toshkent shahar boshqarmasi boshligʻi, tuman IIO FMB boshligʻi, prokuratura, hokimiyat vakillari, mahalla yettiliklari va boshqa masʼullar ishtirok etdi.
Tumanda jinoyatchilikka qarshi kurashish, huquqbuzarliklarning oldini olish yoʻnalishida amalga oshirilayotgan ishlar, joriy yilning toʻrt oyi davomida sodir etilgan jinoyatlar tahlil qilindi.
Yigʻilish davomida soʻzga chiqqanlar dastlab amalga oshirilgan ishlar haqida toʻxtalib oʻtdi. Xususan, tumanda oldini olish mumkin boʻlgan jinoyatlar 2,3 foizga pasaygani, 15 ta mahallada umuman jinoyat sodir etilmagani, 14 ta mahallada aholi soniga koʻra jinoyat kamaygani yaxshi natija boʻlsa-da, biroq, ogʻir va oʻta ogʻir jinoyatlar soni oshgani tashvishli holat ekanligi qayd etildi.
Qayd etilgan davrda profilaktika inspektorlari tomonidan jami 1 660 nafar ijtimoiy profilaktika obyektlariga xulosalar taqdim etilgan. Ushbu xulosalarning 81 foizi, yaʼni 1 358 nafari boʻyicha amaliy yordam koʻrsatilib, qoʻshma xulosalar rasmiylashtirilgan. Biroq, 302 nafar yoki 19 foiz fuqarolarning muammolari hanuzgacha hal etilmagan. Ijtimoiy profilaktika tadbirlari manzilli amalga oshirilmaganligi oqibatida muqaddam sudlanganlar, yoshlar, ayollar, voyaga yetmaganlar va ishsizlar tomonidan jinoyat sodir etilishiga qoʻl qoʻyilgan.
Tumanda kriminogen vaziyatni barqarorlashtirish va jinoyatlarni oldini olish maqsadida masʼullarga bir qator topshiriqlar berildi. Jumladan, maishiy turdagi jinoyatlar sodir etilishini oldini olish maqsadida notinch oilalar bilan ishlash, ijtimoiy-maishiy nizolarni barvaqt aniqlash va hal etish, mahalla yettiligi hamkorligini kuchaytirish, sodir etilgan jinoyatlarni muhokama qilish, tuzilgan yoʻl xaritalarini qayta xatlovdan oʻtkazib, manzilli rejalarni belgilash shular jumlasidandir.
Bu kabi uchrashuvlar boshqa tumanlarda ham davom etmoqda.
Toshkent shahar IIBB Axborot xizmati