Buxoroda oilaviy bolalar uylari va bolalar uchun tashkil etilgan “Kichik hajmli” markazlar faoliyati oʻrganildi
2026-05-18 11:05:00 / Yangiliklar
Oʻzbekiston Respublikasi Ichki ishlar vazirligi Jamoat xavfsizligi departamenti Huquqbuzarliklar profilaktikasi xizmati boshligʻining oʻrinbosari hamda Buxoro viloyati Ichki ishlar boshqarmasi masʼul xodimlari tomonidan hududdagi oilaviy bolalar uylari va bolalar uchun tashkil etilgan “Kichik hajmli” markazlarda joylashtirilgan voyaga yetmaganlarning yashash va tarbiyalanish sharoitlari oʻrganildi.
Oʻrganishlar davomida tarbiyalanuvchilarga yaratilgan maishiy sharoitlar, ularning taʼlim-tarbiya jarayonlari, boʻsh vaqtini mazmunli tashkil etish, tibbiy xizmat hamda psixologik qoʻllab-quvvatlash masalalariga alohida eʼtibor qaratildi. Shuningdek, voyaga yetmaganlar bilan yakka tartibda profilaktik suhbatlar oʻtkazilib, ularning huquq va manfaatlarini himoya qilish, sogʻlom turmush tarziga rioya etish, turli salbiy illatlar va huquqbuzarliklarning oldini olish yuzasidan zarur tavsiya hamda tushuntirishlar berildi.
Masʼullar tomonidan tarbiyalanuvchilarning murojaat va takliflari tinglanib, mavjud muammolarni bartaraf etish boʻyicha tegishli mutasaddilarga aniq vazifalar belgilab berildi. Mazkur tadbirlar voyaga yetmaganlar oʻrtasida huquqbuzarlik va nazoratsizlikning oldini olish, ularni har tomonlama qoʻllab-quvvatlash hamda sogʻlom ijtimoiy muhitni shakllantirishga xizmat qilmoqda.
Buxoro viloyati IIB Axborot xizmati