O‘zbеkiston Rеspublikаsi Ichki ishlаr vаzirligi

Maʼlumki, Oʻzbekiston Respublikasi Prezidentining axborot-kommunikatsiya texnologiyalari sohasini yangi bosqichga olib chiqish chora-tadbirlari toʻgʻrisidagi qaroriga asosan Ichki ishlar vazirligining tarkibiy va hududiy boʻlinmalari faoliyatini raqamlashtirish, xususan “Yagona himoyalangan elektron hujjat aylanish tizimi”ni amaliyotga keng joriy etish vazifasi belgilangan.

Mazkur topshiriqlar ijrosini Andijon viloyatida samarali tashkil etish maqsadida Ichki ishlar vazirligi ishchi guruhi tomonidan sohaviy xizmatlar va masʼul xodimlar ishtirokida amaliy oʻquv seminari oʻtkazildi.

Seminar davomida ishtirokchilarga “Yagona himoyalangan elektron hujjat aylanish tizimi”ning imkoniyatlari, uning ish samaradorligini oshirishdagi oʻrni, axborot xavfsizligini taʼminlashdagi ahamiyati hamda xizmat faoliyatida hujjatlar bilan ishlash jarayonlarini soddalashtirishga qaratilgan qulayliklari haqida atroflicha maʼlumotlar berildi.

Shuningdek, elektron hujjat aylanish tizimini bosqichma-bosqich joriy qilish tartiblari, amaliyotda uchrayotgan ayrim muammolar va ularni bartaraf etish yuzasidan amaliy tushuntirishlar berildi. Tizim orqali xizmat faoliyatida inson omilini qisqartirish, ortiqcha qogʻozbozlikning oldini olish, ijro intizomini mustahkamlash hamda vaqt tejamkorligiga erishish mumkinligi alohida taʼkidlandi.

Tadbir davomida sohada oʻtgan davr mobaynida amalga oshirilgan ishlar tahlil qilinib, raqamli transformatsiya jarayonlarini yanada jadallashtirish, zamonaviy texnologiyalarni ichki ishlar organlari faoliyatiga keng tatbiq etish boʻyicha ustuvor vazifalar belgilab olindi.

Qayd etilganidek, bugungi kunda raqamlashtirish jarayonlari — ichki ishlar organlari tizimini zamon talablari asosida takomillashtirish, aholiga tezkor va sifatli xizmat koʻrsatish hamda tizim faoliyatida ochiqlik va samaradorlikni taʼminlashning muhim omili hisoblanadi.

Andijon viloyati IIB Axborot xizmati