Surxondaryo viloyatida Prezident qarorlari ijrosi hamda Chilonzor va Mirzo Ulugʻbek tumanlari tajribasi doirasidagi ishlar muhokama qilindi
2026-05-17 12:05:00 / Yangiliklar
Oʻzbekiston Respublikasi Prezidentining PQ-1-son va PQ-2-son qarorlari ijrosi, “Chilonzor tajribasi” hamda “Mirzo Ulugʻbek tumani tajribasi” doirasida Denov tumanida oʻrganishlar olib borilib, sodir etilgan jinoyat muhokama qilindi.
Denov tumani hokimligi majlislar zalida mahalla hududlarida xavfsiz muhitni yaratish Prezidentimizning PQ-1-son va PQ-2-son qarorlari ijrosi, “Chilonzor tajribasi” borasidagi ishlar atroflicha oʻrganilib, viloyat hokimi Ulugʻbek Qosimov, viloyat ichki ishlar boshqarmasi boshligʻi, polkovnik Timur Ismailov hamda viloyat prokurori Baxtiyar Babadjanovlar rahbarligida videoselektor tarzida viloyat va tuman masʼullari ishtirokida muhokama yigʻilish oʻtkazildi.
Xususan, Prezidentimizning PQ-1 va PQ-2-son qarorlari ijrosi, “Chilonzor tajribasi” hamda “Mirzo Ulugʻbek tumani tajribasi” doirasida amalga oshirilayotgan ishlar, mahallalarda jinoyat va huquqbuzarliklarni oldini olish, ijtimoiy holati ogʻir hududlarni “jinoyatchilikdan xoli hudud”ga aylantirish, “ogʻir” toifadagi yoshlar bilan ishlash, xotin-qizlar oʻrtasida jinoyatlarning barvaqt oldini olish, oilaviy muhitni sogʻlomlashtirish, aholi bandligini taʼminlash kabi masalalar muhokama qilindi.
Shu bilan birga koʻp qavatli turar-joy binolari va boshqa hududlarni kameralashtirish, qoʻriqqa olish, aholi uchun yaratilayotgan sharoitlar, surunkali ichkilikbozlikka, giyohvandlik va zaharvandlikka moyil shaxslarni davolash va reabilitatsiya qilish boʻyicha bajarilgan ishlar ham muhokama qilindi.
Yigʻilishda kriminogen vaziyati murakkab boʻlgan mahallalarda faoliyat olib borayotgan “yettilik”ning amalga oshirayotgan ishlari va yoʻl qoʻygan kamchiliklari tanqidiy koʻrib chiqilib, ularni bartaraf etish boʻyicha aniq vazifalar belgilab berildi.
Shuningdek, Denov tumani “Yangi ariq” mahallasida sodir etilgan jinoyat muhokama qilinib, kelgusida bunday holatlarning oldini olish maqsadida mutasaddilarga tegishli topshiriqlar berildi.
Bu kabi tizimli va manzilli ishlar hududlarda tinchlik va osoyishtalikni taʼminlash, aholi farovonligini oshirish hamda mahallalarni xavfsiz hududga aylantirish yoʻlida muhim ahamiyat kasb etmoqda.
Surxondaryo viloyati IIB Axborot xizmati