Fargʻona viloyati ichki ishlar organlari faoliyati samaradorligini oshirish va ilgʻor boshqaruv yondashuvlarini joriy etish yoʻlida
2026-05-16 09:00:00 / Yangiliklar
Ichki ishlar vazirining birinchi oʻrinbosari — Jamoat xavfsizligi departamenti boshligʻi general mayor Rustam Djurayev Fargʻona viloyatining barcha tumanlariga tashrif buyurib, ichki ishlar organlari, ularning tarkibiy va hududiy boʻlinmalari faoliyati hamda avval berilgan topshiriqlar ijrosi holatini oʻrgandi.
Oʻrganish natijalariga koʻra, uning raisligida Fargʻona viloyati IIB rahbariyati va tuman boʻlinmalari rahbarlari ishtirokida kengaytirilgan yigʻilish oʻtkazilib, unda tezkor-xizmat faoliyati holati, huquqbuzarliklarning oldini olish va hisobot davridagi ishlar natijalari boʻyicha masʼul rahbarlarning maʼruzalari eshitildi.
Yigʻilish davomida Fargʻona viloyati ichki ishlar organlari faoliyatiga “Mirzo-Ulugʻbek” va “Chilonzor” tajribalariga asoslangan boshqaruv yondashuvlarini jadal va tizimli joriy etish zaruratiga alohida eʼtibor qaratildi.
Shu sababli, tuman va shahar hokimliklari huzurida ichki ishlar organlari hamda hamkor tashkilot (energetika, gaz va suv taʼminoti, kommunal xizmatlar, sogʻliqni saqlash, bandlik va boshqalar) vakillari ishtirokida idoralararo shtablar tashkil etish, ularning uzluksiz faoliyatini yagona tezkorlik mexanizmi sifatida yoʻlga qoʻyish vazifasi yuklatildi.
Aholi gavjum joylarda jamoat tartibini saqlash va fuqarolar xavfsizligini taʼminlash masalasiga alohida topshiriq berildi.
Xususan, har kuni oʻrtacha 40–50 ming nafar aholi va mehmonlar, jumladan viloyat va vodiy aholisi, shuningdek xorijiy davlatlardan keluvchi mehmonlar tashrif buyuradigan “Margʻilon Siti” turar-joy va savdo majmuasi hududida jamoat tartibi ustidan doimiy nazoratni kuchaytirish, tizimli profilaktik nazoratni yoʻlga qoʻyish, hamda mazkur hududda operativ vaziyatning barqarorligini taʼminlash vazifasi yuklatildi.
Shuningdek, fuqarolar murojaatlari bilan ishlash sifatini yaxshilash, boshqaruv jarayonlarini raqamlashtirishni kuchaytirish, zamonaviy tahliliy instrumentlar va texnologiyalar, shu jumladan sunʼiy intellekt elementlarini keng joriy etish boʻyicha topshiriqlar berildi.
Yigʻilish yakunida general mayor Rustam Djurayev tomonidan aniq koʻrsatma va manzilli vazifalar belgilab berildi.
IIV Jamoat xavfsizligi departamenti Axborot xizmati