IIV Yoʻl harakati xavfsizligi xizmati rahbariyati tomonidan Andijon viloyatida oʻrganishlar olib borildi
2026-05-15 19:20:00 / Yangiliklar
Tadbirlar davomida Andijon viloyati IIB JXX YHXB faoliyati, xodimlar uchun yaratilgan shart-sharoitlar hamda yoʻl harakati xavfsizligini taʼminlash borasida olib borilayotgan ishlar oʻrganilib, xizmat samaradorligini oshirish maqsadida masʼullarga tegishli koʻrsatmalar berildi.
Shuningdek, Shahrixon tumani IIB JXX Yoʻl harakati xavfsizligi boʻlinmasi hamda 5-tumanlararo roʻyxatdan oʻtkazish va imtihon olish boʻlimi maʼmuriy binosidagi sharoitlar koʻzdan kechirilib, fuqarolarga koʻrsatilayotgan xizmatlar sifatiga alohida eʼtibor qaratildi.
Tashrif doirasida tumanda sodir etilgan yoʻl-transport hodisalari tahlil qilinib, ularning kelib chiqish sabablari muhokama etildi. YTHlarning oldini olish, harakat ishtirokchilari oʻrtasida intizomni mustahkamlash va profilaktik tadbirlarni kuchaytirish boʻyicha kelgusi vazifalar belgilab olindi.
Shu bilan birga, tumanda IIV JXD YHXX rahbarining sayyor qabuli ham oʻtkazildi. Qabul davomida fuqarolarning yoʻl harakati xavfsizligini taʼminlash va harakatni tashkil etishga oid bir qancha murojaat hamda takliflari tinglandi. Murojaatlarning koʻplari joyida ijobiy hal etilib, ayrim murojaatlar boʻyicha masʼullarga topshiriqlar berildi va ijrosi nazoratga olindi.
Bundan tashqari, Oltinkoʻl tumanidagi “Qumbozor” chorrahasida harakat xavfsizligini taʼminlash va tirbandliklarning oldini olish maqsadida amalga oshirilayotgan ishlar bilan tanishildi.
IIV Yoʻl harakati xavfsizligi xizmati Axborot xizmati