O‘zbеkiston Rеspublikаsi Ichki ishlаr vаzirligi

15-may — Xalqaro oila kuni munosabati bilan Ichki ishlar vazirligi tizimida xizmat qilayotgan xodimlar oʻrtasida 2022-yildan buyon “Namunali oila” koʻrik-tanlovi oʻtkazib kelinmoqda.

Mazkur tanlovdan koʻzlangan asosiy maqsad — oila muqaddasligini ulugʻlash, milliy qadriyatlarni asrab-avaylash, ichki ishlar organlari xodimlari oilalari oʻrtasida sogʻlom maʼnaviy muhitni mustahkamlash, yoshlarni oilaviy hayotga tayyorlash hamda ibratli oilalar tajribasini ommalashtirishdan iborat.

Jumladan, bu yil ham tanlovning respublika bosqichi Boʻstonliq tumanidagi IIV “Oqtosh” oromgohida yuqori saviyada tashkil etildi. Tanlovning hududiy saralash bosqichlarida respublika boʻylab 300 dan ortiq oila ishtirok etdi. Saralash jarayonlari yakuniga koʻra eng munosib deb topilgan 19 ta oila respublika bosqichiga yoʻllanmani qoʻlga kiritdi.

Tadbirda vazirlik rahbariyati, maʼnaviyat va maʼrifat sohasi vakillari, ijodkorlar hamda jamoatchilik faollari ishtirok etdi.

Koʻrik-tanlov ishtirokchilari “Tanishtirish”, “Bu mening oilam”, “Biz kitobxon oilamiz” kabi shartlar orqali oʻzlarining hayot tarzi, oilaviy anʼanalari, kitobxonlik madaniyati va ijodiy salohiyatini namoyon etdi. Milliy qoʻshiq, sheʼr, sahna koʻrinishlari va raqslar tadbirga yanada koʻtarinki ruh bagʻishladi.

Tanlov yakuniga koʻra, 1-oʻrin — katta serjant Roziqovlar oilasi (Navoiy viloyati), 2-oʻrin — mayor Abdullayevlar oilasi (IIV markaziy apparat), 3-oʻrin — mayor Jumaboyevlar (Transport va turizm obyektlarida xavfsizlikni taʼminlash departamenti) oilasi egalladi.

Shuningdek, qator ishtirokchilar turli nominatsiyalar boʻyicha ham taqdirlandi. Jumladan, “Zukko oila” — Toshkent viloyati IIBB katta serjant Toʻxtasinovlar oilasi, “Faol oila” — Toshkent shahar IIBB mayor Roziqovlar oilasi, “Ibratli oila” — Andijon viloyati IIB kapitan Abbosxonovlar oilasi, “Ijodkor farzand” — Fargʻona viloyati IIB mayor Asqarovlar oilasi, “Sportchi oila” — Jazoni ijro etish departamenti Baxriddinovlar oilasi.

Shu bilan birga, tadbir doirasida oromgohda xodimlarning oila aʼzolari uchun mazmunli dam olish tadbirlari tashkil etilib, jumladan, xotin-qizlar ishtirokida davra suhbati hamda bolalar oʻrtasida turli zakovat va qiziqarli bahr-u bayt oʻyinlari oʻtkazildi.

Tadbir davomida soʻzga chiqqanlar oila jamiyatning eng mustahkam poydevori ekanini, ayniqsa huquqni muhofaza qiluvchi tizim xodimlari uchun sogʻlom va ahil oila muhiti katta ahamiyat kasb etishini taʼkidladi.