Andijon shahar hokimligida IIV “Xavfsiz shahar” markazi mutaxassislari tomonidan seminar oʻtkazildi
2026-05-15 15:05:00 / Yangiliklar
Seminarda Oʻzbekiston Respublikasi Prezidentining PQ-1-son qarori ijrosi yuzasidan hududlarda “Xavfsiz shahar” tizimlarini bosqichma-bosqich joriy etish hamda videokuzatuv infratuzilmasini rivojlantirish masalalari muhokama qilindi.
Unda viloyat hokimligining Qurilish va infratuzilmalarni rivojlantirish kotibiyati hamda Aholini ijtimoiy qoʻllab-quvvatlash kotibiyati rahbarlari, Viloyat elektr tarmoqlari korxonasi, “Oʻzbektelekom” AK hududiy filiali, prokuratura va ichki ishlar organlarining masʼul xodimlari ishtirok etdi. Shuningdek, tuman IIB rahbarlari ham onlayn tarzda qatnashdi.
Yigʻilish davomida hududlarda “Xavfsiz shahar” konsepsiyasi doirasida amalga oshirilayotgan ishlar, intellektual videokuzatuv qurilmalariga qoʻyiladigan texnik talablar, ularni oʻrnatish meʼyorlari, maʼlumotlarni uzatish tarmoqlarini tashkil etish hamda infratuzilmani tayyorlash masalalari atroflicha muhokama qilindi.
Mutasaddilar tomonidan hududlarda zamonaviy raqamli xavfsizlik tizimlarini joriy etish, mavjud infratuzilmani texnik jihatdan tayyorlash hamda sunʼiy intellekt asosidagi videokuzatuv tizimlari imkoniyatlaridan samarali foydalanish boʻyicha tegishli vazifalar belgilab olindi.
Ichki ishlar vazirligining “Xavfsiz shahar” tizimlarini rivojlantirish markazi