Ichki ishlar vazirligi rahbariyati Qoraqalpogʻistonda mahallalar faoliyati va yoshlar uchun yaratilgan sharoitlar bilan tanishdi
2026-05-15 11:00:00 / Yangiliklar
Ichki ishlar vazirligi rahbariyati tomonidan Qoraqalpogʻiston Respublikasida aholi, ayniqsa yoshlar bilan ishlash, ular uchun yaratilgan shart-sharoitlarni oʻrganish hamda mahallalarda huquqbuzarliklarning oldini olish borasida amalga oshirilayotgan ishlar bilan tanishish maqsadida qator manzillarda uchrashuvlar oʻtkazildi.
Jumladan, Nukus shahridagi “Jeke terek” va “Turan” mahallalari, shuningdek, Taxiatosh tumanidagi “Jayxun” mahallasiga tashrif buyurilib, mahallalarning “yettiligi” faoliyati, aholi bilan ishlash tizimi hamda yoshlarga yaratilgan imkoniyatlar atroflicha koʻzdan kechirildi.
Tashrif davomida mahallalarda yoshlarning boʻsh vaqtlarini mazmunli tashkil etish, ularni kasb-hunar va sportga jalb qilish, maʼnaviy-maʼrifiy tadbirlarni kuchaytirish borasida amalga oshirilayotgan ishlar muhokama qilindi. Shu bilan birga, yoshlar oʻrtasida huquqbuzarlik va jinoyatchilikning oldini olishda profilaktika inspektorlarining oʻrni alohida taʼkidlandi.
Profilaktika inspektorlari tomonidan mahallalarda fuqarolar, ayniqsa yoshlar bilan doimiy muloqot oʻrnatish, muammolarni oʻz vaqtida aniqlash va bartaraf etish, notinch oilalar hamda nazoratdagi shaxslar bilan manzilli ishlar olib borish orqali tinchlik va osoyishtalikni taʼminlashga alohida eʼtibor qaratilmoqda.
Shuningdek, Ichki ishlar vazirligi rahbariyati Nukus shahridagi 55-sonli umumiy oʻrta taʼlim maktabida ham boʻlib, taʼlim muassasasida oʻquvchilar uchun yaratilgan shart-sharoitlar, zamonaviy sinfxonalar, sport va toʻgaraklar faoliyati bilan tanishdi. Maktabda yoshlarni vatanparvarlik ruhida tarbiyalash, ularning bilim olishi va iqtidorini rivojlantirish uchun yaratilgan imkoniyatlar yuqori baholandi.
Uchrashuvlar davomida masʼullarga yoshlar bilan ishlash tizimini yanada kuchaytirish, mahallalarda profilaktik tadbirlarni samarali tashkil etish hamda aholi murojaatlariga tezkor va manzilli yondashish boʻyicha tegishli topshiriqlar berildi.
Bugungi kunda profilaktika inspektorlari tomonidan mahallalarda xavfsiz muhitni taʼminlash, fuqarolarning huquqiy ongi va madaniyatini oshirish, yoshlarni turli salbiy taʼsirlardan asrash borasida keng koʻlamli ishlar izchil davom ettirilmoqda.
Transport va turizm obyektlarida xavfsizlikni taʼminlash Departamenti Axborot guruhi