IIV rahbariyati Qoraqalpogʻiston Respublikasi Shoʻmanoy tumanida boʻlib, “Monshaqli” mahallasi hamda 7-sonli umumiy oʻrta taʼlim maktabida yoshlar uchun yaratilgan shart-sharoitlar bilan tanishdi
2026-05-14 09:40:00 / Yangiliklar
Ichki ishlar vaziri oʻrinbosari, general-mayor Mirzaraximov Baxodir Yuldoshevich tashrif davomida mahallada jinoyatchilik va huquqbuzarliklarning oldini olish, aholi murojaatlari bilan ishlash, ijtimoiy muhit barqarorligini taʼminlash hamda fuqarolar xavfsizligini mustahkamlash borasida amalga oshirilayotgan ishlar muhokama qilindi.
Ayniqsa, mahalla “yettiligi” aʼzolari va profilaktika inspektori tomonidan aholi, ayniqsa yoshlar va muammoli oilalar bilan olib borilayotgan manzilli ishlar, profilaktik tadbirlar hamda huquqbuzarliklarni barvaqt oldini olish boʻyicha amalga oshirilayotgan chora-tadbirlarga alohida eʼtibor qaratildi.
Shuningdek, profilaktika inspektorining xizmat xonasi, aholi bilan ishlash tizimi, raqamlashtirilgan nazorat daftarlari va profilaktik hisobda turuvchi shaxslar bilan ishlash amaliyoti koʻzdan kechirildi. Mahallada tinchlik va osoyishtalikni taʼminlash, muammolarni “xonadonbay” asosida oʻrganish hamda har bir murojaatga tezkor munosabat bildirish borasidagi ishlar ijobiy baholandi.
Tashrif doirasida tumandagi 7-sonli umumiy oʻrta taʼlim maktabida ham boʻlindi. U yerda oʻquvchi-yoshlar uchun yaratilgan shart-sharoitlar, ularning boʻsh vaqtlarini mazmunli tashkil etish, vatanparvarlik va huquqiy tarbiya yoʻnalishida amalga oshirilayotgan ishlar bilan tanishildi.
Uchrashuv yakunida mutasaddilarga mahalla “yettiligi” hamda profilaktika inspektorlari faoliyati samaradorligini yanada oshirish, aholi bilan muloqotni kuchaytirish va huquqbuzarliklarning barvaqt oldini olish borasida tegishli tavsiya va topshiriqlar berildi.
Transport va turizm obyektlarida xavfsizlikni taʼminlash Departamenti Axborot guruhi