Navoiy viloyatida jinoyatchilikni jilovlash, mahalla yettiligi faoliyati va xodimlarning ijtimoiy himoyasi masalalari tumanlar kesimida tahlil qilinmoqda
2026-05-13 18:00:00 / Yangiliklar
Ichki ishlar vaziri oʻrinbosari, polkovnik Diyorbek Sattarov rahbarligidagi vazirlik ishchi guruhi Navoiy viloyatida xizmat faoliyati samaradorligini tahlil qilmoqda.
Dastlab Qiziltepa tumanida Oʻzbekiston Respublikasi Prezidentining 2026-yil 5-yanvardagi PQ-1-son qarori ijrosi doirasida tezkor-profilaktik vaziyat, jamoat xavfsizligini taʼminlash, fuqarolar murojaatlari bilan ishlash hamda yoʻl-transport hodisalarining oldini olish borasidagi ishlar koʻrib chiqildi.
“Oʻzbekiston” mahallasida mahalla yettiligi, faollar va nuroniylar bilan uchrashuv oʻtkazilib, oilaviy muammolarni hal etishda hamkorlikni kuchaytirish masalalari muhokama qilindi.
Ishchi guruh ishlab chiqarish korxonalarida yaratilgan mehnat sharoitlari, xavfsizlik talablariga rioya etilishi hamda aholi bandligini taʼminlash boʻyicha amalga oshirilayotgan ishlar bilan tanishdi. Probatsiya nazoratidagi fuqarolar bilan huquqbuzarliklarning oldini olish yuzasidan suhbatlar oʻtkazildi.
Tadbirlar Konimex tumanida davom ettirilib, jinoyat va huquqbuzarliklarning oldini olish, mahalla yettiligi bilan hamkorlik hamda profilaktik ishlar samaradorligi muhokama qilindi. “Navroʻz” mahallasida jamoatchilik vakillari bilan uchrashuvda aholi murojaatlarini manzilli hal etish va kriminogen vaziyatni barqarorlashtirish masalalariga alohida eʼtibor qaratildi.
Shuningdek, profilaktika inspektorining xizmat faoliyati va yashash sharoiti koʻzdan kechirilib, xodimlarni ijtimoiy qoʻllab-quvvatlashning xizmat samaradorligidagi ahamiyati taʼkidlandi.
Ishchi guruh faoliyati viloyat hududlarida davom etmoqda.