Hamdoʻstlik mamlakatlari ichki ishlar vazirliklari delegatsiyalariga Toshkentda xavfsizlik va madaniy meros loyihalari namoyish etildi
2026-05-13 19:00:00 / Yangiliklar
Toshkentda boʻlib turgan MDH ishtirokchi-davlatlar ichki ishlar vazirliklarining jinoyatchilikka qarshi kurashish tuzilmalari rahbarlari Toshkent shahar IIBB Situatsion-tahliliy markazi faoliyati bilan yaqindan tanishdilar. Jarayonda markazning jamoat xavfsizligini taʼminlash, huquqbuzarliklarning oldini olish va zamonaviy axborot texnologiyalari asosida shahardagi vaziyatni monitoring qilish borasidagi imkoniyatlari namoyish etildi.
Mehmonlarga markazda qoʻllanilayotgan raqamli kuzatuv tizimlari, tezkor tahlil va muvofiqlashtirish jarayonlari, markazning huquqni muhofaza qiluvchi organlar faoliyati samaradorligini oshirishdagi ahamiyati haqida axborot berildi.
Shundan soʻng mamlakatimiz mehmonlari, Prezident Shavkat Mirziyoyev tashabbusi bilan bunyod etilgan Markaziy Osiyoda yagona boʻlgan unikal loyiha Islom sivilizatsiyasi markazi bilan tanishdilar.
Insoniyat tamaddunining ildizi boʻlgan mamlakatimiz hududida rivoj topgan tarixiy sivilizatsiyalar, fan, madaniyat, sanʼat va adabiyotda ajdodlarimiz tomonidan qoldirilgan ilmiy-badiiy meros hamda zamonaviy texnologiyalarning bir maskandagi mujassamlashuvi tashrif ishtirokchilarida katta taassurot qoldirdi.
Tadbir davomida mehmonlar poytaxtimizdagi Gʻalaba bogʻiga tashrif buyurdilar.
9-may “Xotira va qadrlash kuni” munosabati bilan tashkil etilgan maʼdaniy-maʼrifiy tadbirlar shukuhi davom etayotgan kunlarda, ikkinchi jahon urushida bir safda turib fashizmga qarshi kurashgan millatlar vakillari sharafiga Harbiy orkestr ijrosida “Xotirlash kuyi” yangradi. Tashrif ishtirokchilari “Matonat madhiyasi” yodgorlik majmuasiga gulchambar qoʻydilar.
Hamdoʻstlik davlatlaridan tashrif buyurgan mehmonlarga oʻzbek xalqining fashizm ustidan qozonilgan gʻalabaga qoʻshgan ulkan hissasi, urush yillarida front ortida koʻrsatgan mehnat shijoati, urush oʻchoqlaridan keltirilgan oilalar va bolalarga koʻrsatgan mehr-muruvvati haqida batafsil maʼlumot berildi.
Shuningdek, delegatsiya rahbarlari poytaxtimizda tashkil etilgan xavfsiz turizmni taʼminlash boʻlinmalarining faoliyati bilan ham tanishdilar.