Yoʻllarda bolalar xavfsizligini taʼminlash maqsadida amalga oshirilayotgan ishlar hamda yoʻl qoʻyilayotgan kamchiliklarga bagʻishlangan tanqidiy yigʻilishi oʻtkazildi
2026-05-13 18:00:00 / Yangiliklar
IIV Jamoat xavfsizligi departamenti Yoʻl harakati xavfsizligi xizmati hamda Maktabgacha va maktab taʼlimi vazirligi tomonidan bolalar xavfsizligini taʼminlashga qaratilgan kengaytirilgan tanqidiy yigʻilish boʻlib oʻtdi.
Unda respublika hududida “Yoʻllarda xavfsiz bolalik“ tamoyili asosida amalga oshirilayotgan profilaktik chora-tadbirlar, taʼlim muassasalari atrofida yoʻl infratuzilmasini yaxshilash, bolalarda yoʻl harakati madaniyatini shakllantirish borasida olib borilayotgan ishlar tahlil qilindi.
Oʻzbekiston Respublikasi Prezidentining PQ-316-son qarori bilan tasdiqlangan “Xavfsiz va ravon yoʻl“ umummilliy dasturi doirasida respublikadagi 7 mingdan ortiq maktablarda yoʻl harakati sinfxonalari, 5 mingga yaqin maktabgacha taʼlim tashkilotlarida maxsus maydonchalar tashkil etildi. Shuningdek, taʼlim muassasalari atrofida minglab tezlik cheklovchi yoʻl belgilari, qavariq piyodalar oʻtish joylari va 172 ta tugmali svetoforlar oʻrnatildi.
Yigʻilishda bolalarni tashish bilan bogʻliq qoidalarga rioya etilmayotgani, ayrim taʼlim muassasalari tomonidan xavfsizlik talablariga zid ravishda yengil avtomobillarda bolalarni tashish holatlari saqlanib qolayotgani keskin tanqid qilindi.
Xususan, joriy yilning oʻtgan davrida voyaga yetmagan yoʻlovchilarni tashish bilan bogʻliq 598 ta qoidabuzarlik aniqlangani, ayrim holatlarda haydovchilarda tegishli toifadagi haydovchilik guvohnomasi mavjud emasligi, transport vositalari esa bolalarni tashish talablariga mutlaqo javob bermasligi aniqlangan.
Shuningdek, Navoiy viloyati Nurota tumanida xususiy bogʻcha tarbiyalanuvchilari ishtirokida sodir boʻlgan ayanchli yoʻl-transport hodisasi misolida masʼullar, taʼlim muassasalari rahbarlari va ota-onalarning masʼuliyati yana bir bor eslatib oʻtildi.
Yigʻilish davomida bolalar xavfsizligini taʼminlash boʻyicha qator takliflar ilgari surildi. Jumladan, bolalarni tashish faoliyati uchun majburiy litsenziyalash tizimini joriy etish, transport vositalarini GPS va kuzatuv kameralari bilan jihozlash, yengil avtomobillarda bolalar tashishni qatʼiy cheklash, raqamli nazorat platformasini ishga tushirish hamda sohada javobgarlik choralarini kuchaytirish zarurligi taʼkidlandi.
Yigʻilish yakunida mutasaddi tashkilotlar hamda hududiy masʼullarga bolalarning yoʻllardagi xavfsizligini taʼminlash, profilaktik tadbirlar samaradorligini oshirish va mavjud muammolarni bartaraf etish yuzasidan tegishli topshiriqlar berildi.
IIV Jamoat xavfsizligi departamenti Yoʻl harakati xavfsizligi xizmati Axborot xizmati