Ichki ishlar vazirligi rahbariyati tomonidan Xorazm viloyatida jamoat xavfsizligini taʼminlash borasida oʻrganish ishlari olib borildi
2026-05-12 19:00:00 / Yangiliklar
Oʻzbekiston Respublikasi Ichki ishlar vazirligi oʻrinbosari, general-mayor Bahodir Mirzarahimov tomonidan Xorazm viloyatida jamoat xavfsizligini taʼminlash, aholi bilan ishlash tizimi hamda profilaktika faoliyatini yanada takomillashtirish maqsadida bir qator obyekt va muassasalarda oʻrganish ishlari olib borildi.
Jumladan, Yangiariq tumani Yangiobod mahallasida, IT-Park binosida joylashgan “Chilonzor tajribasi” asosida tashkil etilgan SHTAB faoliyati koʻzdan kechirildi. U yerda aholi murojaatlari bilan ishlash, huquqbuzarliklarning oldini olish, yoshlar va xotin-qizlar bilan manzilli ishlash boʻyicha amalga oshirilayotgan ishlar tahlil qilindi. Shuningdek, raqamli texnologiyalardan samarali foydalanish, profilaktika inspektorlari va sektorlar oʻrtasidagi hamkorlik masalalari muhokama etildi.
Tashrif davomida mutasaddilarga aholi muammolarini oʻz vaqtida aniqlash, har bir xonadon bilan tizimli ishlash, jinoyatchilik va huquqbuzarliklarni barvaqt oldini olish boʻyicha aniq topshiriq va tavsiyalar berildi.
Shuningdek, Bogʻot tumanidagi 1-son umumtaʼlim maktabida ham boʻlib, taʼlim muassasasida oʻquvchilar xavfsizligini taʼminlash, yoshlar oʻrtasida huquqbuzarliklarning oldini olish, maʼnaviy-maʼrifiy muhitni yanada mustahkamlash yuzasidan amalga oshirilayotgan ishlar bilan tanishildi. Maktab rahbariyati va masʼul xodimlar bilan oʻtkazilgan muloqotda yoshlarni vatanparvarlik ruhida tarbiyalash, ularning boʻsh vaqtlarini mazmunli tashkil etish muhim ekani taʼkidlandi.
Bundan tashqari, hududiy ichki ishlar organlari xodimlarining kundalik xizmat faoliyati ham oʻrganildi. Xodimlarning xizmat intizomi, aholi bilan muomala madaniyati, murojaatlarga munosabat va profilaktik tadbirlarni amalga oshirish jarayonlari tahlil qilinib, faoliyat samaradorligini oshirish boʻyicha tegishli koʻrsatmalar berildi.
Taʼkidlanganidek, joylardagi profilaktika ishlarini kuchaytirish, aholi bilan yaqin muloqotni taʼminlash hamda huquqbuzarliklarning barvaqt oldini olish ichki ishlar organlari faoliyatining ustuvor vazifalaridan biri boʻlib qolmoqda.
Transport va turizm obyektlarida xavfsizlikni taʼminlash Departamenti Axborot guruhi