O‘zbеkiston Rеspublikаsi Ichki ishlаr vаzirligi

Ichki ishlar vaziri oʻrinbosari polkovnik Diyorbek Sattarov tomonidan Buxoro viloyatining bir qator tumanlari va Buxoro shahrida amalga oshirilayotgan profilaktik tadbirlar, “mahalla yettiligi” faoliyati hamda hududlardagi kriminogen vaziyat atroflicha oʻrganildi.

Dastlab Buxoro tumanidagi “Rabotak” mahalla fuqarolar yigʻinida “mahalla yettiligi” bilan uchrashuv oʻtkazilib, hududda amalga oshirilayotgan ijtimoiy profilaktika ishlari, aholini qiynayotgan muammolar, yoshlar va xotin-qizlar bilan ishlash hamda fuqarolar murojaatlarini oʻz vaqtida koʻrib chiqish masalalari muhokama qilindi. PQ-1 va PQ-2-son qarorlar ijrosi doirasida olib borilgan ishlar natijasida mahallada joriy yilning oʻtgan davrida jinoyat sodir etilmaganligi alohida taʼkidlandi.

Shundan soʻng, Vobkent tumanida profilaktika inspektorlarini xizmat uylari bilan taʼminlash boʻyicha amalga oshirilayotgan ishlar oʻrganilib, Prezident topshiriqlari hamda PQ-2906-son qarori ijrosi doirasida yana bir xizmat uyi foydalanishga topshirildi. Tadbirda ichki ishlar organlari rahbariyati, faxriylar va mahalla faollari ishtirok etdi. Profilaktika inspektori mayor Nusrat Haqberdiyev va uning oila aʼzolari yangi xizmat uyi bilan qutlandi.

Vobkent tumanidagi “Charmgaron” mahallasida ham “mahalla yettiligi” bilan uchrashuv oʻtkazilib, ijtimoiy profilaktika tizimi samaradorligini oshirish, fuqarolar muammolarini manzilli hal etish hamda xavfsizlikni taʼminlash masalalari muhokama qilindi. “Ye-ijtimoiy profilaktika” tizimi orqali amalga oshirilayotgan ishlarni yanada samarali tashkil etish yuzasidan tegishli tavsiyalar berildi.

Gʻijduvon tumanidagi “Taxtaxon” va “Pamoʻza” mahallalarida kriminogen vaziyat, “mahalla yettiligi” faoliyati, profilaktika inspektorlari tomonidan amalga oshirilayotgan ishlar hamda aholi murojaatlari bilan ishlash holati tahlil qilindi. Oʻrganishlar davomida profilaktika inspektorlari xizmat xonalaridagi texnik vositalarning eskirganligi, xonadonlarni qoʻriqlash pultiga ulash ishlari yetarli darajada tashkil etilmaganligi hamda “Olmazor tajribasi” asosida ishlab chiqilgan yoʻl xaritasi ijrosida kamchiliklar mavjudligi koʻrsatib oʻtildi.

Shuningdek, “Degrezon” mahallasi hududida joylashgan Gʻijduvon dehqon bozorida fuqarolar xavfsizligini taʼminlash, sanitariya holatini yaxshilash va mavjud kamchiliklarni bartaraf etish boʻyicha oʻrganish ishlari olib borildi.

Shofirkon tumanidagi “Qalmaqon” mahallasida ham “mahalla yettiligi” faoliyati, hududdagi ijtimoiy muhit va profilaktik ishlar samaradorligi koʻrib chiqildi. “Ijtimoiy profilaktika” tizimida ayrim xulosalar boʻyicha belgilangan chora-tadbirlar toʻliq bajarilmasdan turib qoʻshma xulosalar shakllantirilgani tanqid qilinib, masʼullarga aniq vazifalar belgilab berildi.

Peshku tumanidagi “Chiqirchi” mahallasida “Chilonzor tajribasi” asosida amalga oshirilayotgan ishlar tahlil qilinib, mahallani jinoyatdan holi hududga aylantirish boʻyicha aniq vazifalar belgilab berildi. “Ye-ijtimoiy profilaktika” tizimida ayrim maʼlumotlar haqiqiy holatga mos kelmasligi va qoʻshma xulosalar toʻliq shakllantirilmaganligi yuzasidan eʼtirozlar bildirildi.

Romitan tumanidagi “Guliston” mahallasi va “Romitan sayilgohi”da ham jamoat xavfsizligini taʼminlash, videokuzatuv tizimlari hamda qoʻriqlash vositalari holati oʻrganildi. Ayrim savdo doʻkonlarida yuzni tanib oluvchi kuzatuv kameralarining mavjud emasligi tanqid qilinib, bu borada tegishli choralar koʻrish boʻyicha koʻrsatmalar berildi.

Buxoro shahridagi “Shayx-ul olam” va “Muxtor Ashrafiy” mahallalarida “mahalla yettiligi” bilan muloqot oʻtkazilib, ijtimoiy profilaktika tizimi, ogʻir toifadagi yoshlar va nizoli oilalar bilan ishlash samaradorligi muhokama qilindi. Shuningdek, “Mening inspektorim” platformasiga aholini ulash ishlarini jadallashtirish hamda “Ye-ijtimoiy profilaktika” tizimida qoʻshma xulosalarni sifatli shakllantirish yuzasidan masʼullarga aniq topshiriqlar berildi.

Oʻrganishlar davomida joylarda profilaktika ishlarini kuchaytirish, aholi bilan manzilli ishlash va jinoyatchilikning barvaqt oldini olish ichki ishlar organlarining ustuvor vazifasi ekani alohida taʼkidlandi.

Buxoro viloyati IIB Axborot xizmati