Surxondaryo viloyatida kriminogen vaziyatni barqarorlashtirish masalalari oʻrganilmoqda
2026-05-12 11:15:00 / Yangiliklar
Ichki ishlar vazirining oʻrinbosari polkovnik Ramazon Ashropovning Surxondaryo viloyatida aholi xavfsizligini taʼminlash va jamoat tartibini saqlash borasidagi oʻrganishlari davom etmoqda.
Jumladan, oʻrganish kunida Vazir oʻrinbosari Ramazon Ashropov Denov, Uzun, Sariosiyo, Shoʻrchi va Qumqoʻrgʻon tumanlarida boʻlib, mahallalarda xavfsiz muhitni yaratish borasida amalga oshirilgan ishlarni oʻrgandi.
Unda hududdagi kriminogen vaziyatni barqarorlashtirish, huquqbuzarlik va jinoyatlarning barvaqt oldini olish, ayniqsa, xavf guruhiga kiruvchi shaxslar bilan individual ishlash samaradorligini oshirish masalalariga alohida eʼtibor qaratildi.
Shu bilan birga, mahallalarda yoshlar, ayollar va ishsizlar tomonidan, shuningdek oila-turmush munosabatlari doirasida sodir etiladigan huquqbuzarlik va jinoyatlarning barvaqt oldini olishda “mahalla yettiligi”ning har bir aʼzosi zimmasiga yuklatilgan vazifalarni aniq belgilab olish, ularning masʼuliyatini yanada kuchaytirish yuzasidan koʻrsatmalar berildi.
Oʻrganishlar davom etmoqda.
IIV huzuridagi Tergov departamenti