Surxondaryo viloyatida Ichki ishlar vaziri oʻrinbosari polkovnik Ramazon Ashropovning shaxsiy va sayyor qabullari oʻtkazildi
2026-05-12 11:10:00 / Yangiliklar
Ichki ishlar vazirligi tomonidan aholi bilan ochiq va samarali muloqotni yoʻlga qoʻyish hamda murojaatlar bilan ishlash tizimi samaradorligini oshirish maqsadida Vazirlik huzuridagi Tergov departamenti tomonidan shaxsiy va sayyor qabullar muntazam ravishda tashkil etilmoqda.
Jumladan, 10–11-may kunlari Vazir oʻrinbosari Ramazon Ashropov tomonidan Surxondaryo viloyati IIBda navbatdagi shaxsiy hamda Denov tumanida sayyor qabullar oʻtkazildi. Unda aholining mavjud muammolarini aniqlash va ularni bartaraf etish maqsadida fuqarolarning murojaatlari tinglandi.
Qabullar davomida jami 36 nafar fuqaroning murojaatlari oʻrganildi. Murojaatlarning 13 tasi tergov va surishtiruv faoliyati, 10 tasi tergovga qadar tekshiruv, 4 tasi xodimlarning xatti-harakatlari yuzasidan hamda 9 tasi ichki ishlar organlari faoliyatiga oid boshqa masalalarni tashkil etdi.
Qabullar jarayonida Vazir oʻrinbosari, masʼul rahbar va xodimlar tomonidan fuqarolar bilan ularni qiynayotgan masalalar yuzasidan toʻgʻridan-toʻgʻri muloqot oʻtkazildi. Xususan, tergovga qadar tekshiruv, surishtiruv va dastlabki tergov jarayonlari hamda boshqa yoʻnalishlardagi murojaatlar qabul qilinib, ularni qonuniy va tezkor hal etish boʻyicha masʼullarga aniq koʻrsatmalar berildi.
Aholi bilan bunday ochiq muloqot va shaxsiy qabullar tizimli ravishda davom ettirilmoqda.
IIV huzuridagi Tergov departamenti