Ichki ishlar vazirligi rahbariyati Fargʻona viloyatida jamoat xavfsizligini taʼminlash va huquqbuzarliklar profilaktikasi choralarini oʻrganmoqda
2026-05-10 11:00:00 / Yangiliklar
2026-yil 5-yanvarda Davlat rahbari tomonidan qabul qilingan Qarorlarda belgilangan vazifalari ijrosini taʼminlash maqsadida, Oʻzbekiston Respublikasi ichki ishlar vazirining birinchi oʻrinbosari — Jamoat xavfsizligi departamenti boshligʻi general-mayor Rustam Djurayev Fargʻona viloyatiga tashrif buyurdi.
Xotira va qadrlash kuni munosabati bilan Fargʻona shahri va viloyatning boshqa hududlarida 9-may bayramiga bagʻishlangan tantanali va xotira tadbirlari oʻtkazilayotgan bir paytda Departament rahbari ommaviy tadbirlar oʻtkazilayotgan joylarda jamoat tartibi va fuqarolar xavfsizligini taʼminlash boʻyicha xizmatni tashkil etish jarayonlari bilan shaxsan tanishdi, shuningdek, ichki ishlar organlari hamda boshqa tegishli xizmatlar tomonidan jalb etilgan kuch va vositalarning oʻzaro hamkorligini tekshirdi.
Safar davomida general-mayor Margʻilon shahrining “Navroʻz” mahallasida barpo etilayotgan“Burhoniddin Margʻinoniy ilmiy-maʼrifiy turizm majmuasi” (“Margʻilon siti”) qurilish obyekti va unga tutash hududlarda jamoat tartibi hamda xavfsizlikni taʼminlash boʻyicha rejalashtirilgan chora-tadbirlar bilan tanishdi.
Shuningdek, Fargʻona viloyati 2-mintaqaviy hudud Tezkor vazifalarni bajaruvchi safarbarlik otryadi xodimlarining xizmatni tashkil etish va jangovar shaylik holati oʻrganilib, shaxsiy tarkib bilan oʻquv-amaliy mashgʻulotlar oʻtkazildi.
Xizmat safari doirasida Rustam Djurayev Fargʻona viloyati IIB huzuridagi Voyaga yetmaganlarga ijtimoiy-huquqiy yordam koʻrsatish markazining yangi binosi qurilishi jarayoni bilan tanishdi, shuningdek, 2-mintaqaviy hudud maxsus qabulxonasi va muvofiqlashtirish markazida yaratilgan shart-sharoitlar, boshqaruv tizimi hamda xodimlarning xizmat olib borish sharoitlarini oʻrgandi.
Qoʻqon shahrida general mayor Rustam Djurayev raisligida viloyat IIB rahbariyati, sohaviy xizmatlar, boshqarma va hududiy boʻlinmalar rahbarlari ishtirokida yigʻilish oʻtkazildi. Unda kriminogen vaziyatni yaxshilash va jinoyatchilikka qarshi kurashish faoliyati samaradorligini yanada oshirish masalalari muhokama qilindi.
Yigʻilishda joriy yilning toʻrt oyi yakunlari boʻyicha xizmat faoliyati natijalari tahlil qilinib, bir qator takliflar ilgari surildi. Xususan, patrul-post xizmati boʻlinmalarini uch bosqichli xizmat rejimiga oʻtkazish, shuningdek, probatsiya nazoratidagi va muqaddam sudlangan shaxslar bilan “qizil”, “sariq” va “yashil” toifalar asosida individual ishlash tizimini joriy etish masalalari koʻrib chiqildi.
Shu bilan birga, patrul-post xizmati, huquqbuzarliklar profilaktikasi, probatsiya va yoʻl harakati xavfsizligi xizmatlari faoliyatini yanada takomillashtirish, boʻlinmalarning moddiy-texnik bazasini mustahkamlash hamda maʼmuriy binolar va xizmat obyektlaridagi shart-sharoitlarni yaxshilash boʻyicha ham takliflar bildirildi.
IIV JXD Axborot xizmati