O‘zbеkiston Rеspublikаsi Ichki ishlаr vаzirligi

Ikkinchi jahon urushi yillarida fashizmga qarshi kurashlarda jon fido etgan ajdodlarimiz, urush qatnashchilari va front ortida mehnat qilgan faxriylarga hurmat-ehtirom koʻrsatish 9-may “Xotira va qadrlash kuni”ning oʻziga xos mazmunini ifoda etadi. Davlatimiz rahbari tomonidan ushbu sanaga munosib tayyorgarlik koʻrish boʻyicha imzolangan qarorga koʻra ayni kunlarda yurtimizning barcha hududlarida muhtaram faxriylarimiz eʼzozlanib, ularning unutilmas qahramonliklarini eʼtirof etilmoqda.

Chilonzor tumanida istiqomat qiluvchi Sokolova Tamara Mixaylovnaning mahallasi bugun ayyom shukuhiga bilan toʻlgan. Namunali orkestr musiqasi, bolajonlarning qiziquvchan nigohlari, mehmonlarning davomiy qadamidan onaxonning kayfiyati har qachongidan ham yuqori.

Ichki ishlar vaziri general-leytenant Aziz Tashpulatov Tamara Mixaylovnaning xonadoniga tashrif buyurib, Prezidentimiz tomonidan yoʻllangan tabrikni oʻqib eshittirdi. Leningrad qamalini koʻrgan faxriyning nigohlari bugungi unutilmas lahzalarni, tinch-osuda zamonlarga shukronalikni oʻzida mujassam etgan. Onaxonga davlatimiz rahbarining mukofotlarini topshirilib, mustahkam salomatlik tiladilar. Chilonzorning sokin mahallasida, jonajon qoʻshnilar bilan qurilgan suhbatda ham eng koʻp taʼkidlangani tinchlik soʻzi boʻldi. Darhaqiqat, uning qadrini jahon urishini koʻrganlar chin yurakdan his eta oladi.

1940-yilda tugʻilgan Degtyarova Mariya Akimovna ayni vaqtda Chilonzor tumanida istiqomat qiladi. Uning goʻdakligi va bolaligi konslagerda oʻtganligi bois urush xotiralari murgʻak qalbini qattiq jarohatlagan. Ichki ishlar vazirligi rahbariyati shu yurt rivoji uchun mehnat qilgan Mariya Akimovnaga davlat rahbarining tabriklari va mukofotlari yetkazdi.

Nikolay Petrunin asli Qozogʻistonda tugʻilgan. Ikkinchi jahon urushi vaqtida navqiron yigit boʻlgan va frontdagi janglarda mardonavor qatnashgan qahramonimizning keyingi hayot yoʻli Toshkent bilan bogʻlandi. Sal kam yuz yoshli faxriyga bayram tabriknomasi oʻqib eshittirilib, sovgʻalar topshirildi.

Chilonzor tumanidagi yana bir farishtali manzilda istiqomat qiluvchi Anna Karimovaning xonadonida bugun uning oila aʼzolari va yaqinlari jam boʻlgan. Chinakam urushni oʻz koʻzlari bilan koʻrgan, unda ishtirok etgan bu qahramon ayolning nigohida ham xuddi boshqalar kabi, kamtarin hayot, mehnatga hamohang oʻtgan umr yoʻli va bugunidan minnatdorlik tuygʻularining ifodasini koʻrish mumkin.

Ichki ishlar vazirligi rahbariyati tashrif buyurgan xonadonda umrguzaronlik qilayotgan Kamarova Mariya Sergevena ham tinchlikning qadrini barchamizdan koʻra yaxshiroq anglaydi, yurak-yurakdan his etadi. U bilan kechgan samimiy uchrashuvda, bugungi osoyishta kunlarga yetib kelganidan baxtiyorligi, unga berilayotgan eʼtibordan koʻngli shod ekanligini aytib, mehmonlarga minnatdorlik bildirdi.

Urush taqdirida oʻchmas iz qoldirgan Spivak Natalya Grigoryevna 1937-yilda dunyoga kelgan. Leningrad qamalida yaqinlaridan ayrilganida hali yosh qizaloq boʻlsada allaqachon taqdir uni ulgʻaytirib boʻlgan edi. Onaxonning xonadoniga tashrif buyurgan mehmonlar uning bolalik hikoyalarini tinglab, oʻziga xos xulosa chiqarishdi. Natalya Grigoryevnaga yetkazilgan tabrik va sovgʻalar, xonadon sohibasiga bayramona kayfiyat ulashdi.

Toʻqson yetti yoshni qarshi olgan Nadejda Kudrizkaya asli Leningradda tugʻilib oʻsgan. Quyuq oʻrmonlardagi urush xotiralarini eslashni istamasada, oʻrnak uchun, bugungi tinchlikni qadriga yetish uchun nabiralariga hikoya qilib turadi. Xonadonga tashrif buyurgan mehmonlar qahramonimizning boshidan oʻtkazganlarini tinglab, uning jasorati, mehnat-shijoati uchun bugungi kun avlodlari nomidan minnatdorchilik bildirishdi.

Konslager quchogʻida goʻdakligi oʻtgan, urushdan keyingi ogʻir-qiyinchilik yillarida yosh boshi bilan ogʻir mehnat qilib ulgʻaygan Alla Funtikova ham davlatimiz rahbarining tabriklari va mukofotlarini qabul qilib oldi. Ular bilan suhbatlashar ekansiz bu shonli umr yoʻli allaqachon xalqimizning bebaho maʼnaviy boyligiga aylanganligini his etasiz.

Bu kabi tadbirlar hududiy ichki ishlar organlari tomonidan ham olib borilib, faxriylarimiz xonadonlariga tashriflar, ularga hurmat-ehtirom koʻrsatish kabi xayrli ishlar davom ettirilmoqda.