IIV Markaziy apparatida kitobxonlik madaniyatini rivojlantirishga qaratilgan “Kitoblar yarmarkasi” tashkil etildi
2026-05-08 13:25:00 / Yangiliklar
Oʻzbekiston Respublikasi Prezidenti Shavkat Mirziyoyevning 2026-yil 15-yanvardagi “Kitobxonlik madaniyatini rivojlantirish va aholi Oʻrtasida kitob oʻqishni keng targʻib qilish chora-tadbirlari toʻgʻrisida”gi PQ–9-sonli qarori ijrosini taʼminlash maqsadida, mamlakatimizda 2026–2030-yillarda aholining kitobxonlik darajasini yuksaltirish, ayniqsa davlat xizmatchilari va keng jamoatchilik oʻrtasida kitobxonlik muhitini yanada mustahkamlash borasida keng koʻlamli ishlar amalga oshirilmoqda.
Shu munosabat bilan, joriy yilning 7-may kuni Vazirlik markaziy apparati hududida “Kitoblar yarmarkasi” tashkil etildi.
Mazkur maʼnaviy-maʼrifiy tadbir “Yangi asr avlodi” va “Yoshlar matbuoti” nashriyotlari vakillari bilan hamkorlikda oʻtkazilib, BOOK.UZ brendi tomonidan nashr etilayotgan turli yoʻnalishdagi adabiyotlar kitobxonlarga taqdim etildi.
Yarmarka davomida ishtirokchilar badiiy, ilmiy-ommabop, tarixiy hamda shaxsiy rivojlanishga oid kitoblar bilan yaqindan tanishish imkoniga ega boʻldilar.
Ayniqsa, xodimlar uchun tavsiya etilgan asarlar katta qiziqish uygʻotib, ular tomonidan bir qator kitoblar xarid qilindi.
Tadbir ishtirokchilari bunday maʼrifiy tashabbuslarning ahamiyatini alohida taʼkidlab, tashkilotchilarga samimiy minnatdorchilik bildirdilar.
Bugungi kunda mamlakatimizda kitob nashri va tarqatish tizimini rivojlantirish, yoshlar oʻrtasida mutolaa madaniyatini yuksaltirish, milliy va jahon adabiyotining sara namunalarini keng targʻib etishga alohida eʼtibor qaratilmoqda.
Tashkil etilgan mazkur kitob yarmarkasi ham matbaa sohasini qoʻllab-quvvatlash, yosh avlodning intellektual salohiyati va maʼnaviy dunyoqarashini boyitish, shuningdek, kitobxonlik madaniyatini yanada ommalashtirishga xizmat qiladi.