Andijon viloyati IIB rahbariyati tomonidan Marhamat tumani ichki ishlar boʻlimi uchun yangi barpo etilayotgan maʼmuriy binoning qurilish ishlari koʻzdan kechirildi
2026-05-07 09:00:00 / Yangiliklar
Andijon viloyati IIB boshligʻi, polkovnik Sanjar Djabarov Marhamat tumanida boʻlib, hududda barpo etilayotgan yangi ichki ishlar boʻlimi binosining qurilish jarayonlari bilan yaqindan tanishdi.
Unda qurilish maydonida muhandis-quruvchilar va masʼullar bilan muloqot oʻtkazib, amalga oshirilayotgan bunyodkorlik ishlarining borishi, loyiha koʻlami, mavjud ehtiyojlar hamda taʼminot masalalarini atroflicha muhokama qildi.
Shuningdek, binolarni zamonaviy talablar asosida yanada takomillashtirish boʻyicha oʻzining aniq taklif va tavsiyalarini bildirdi.
Oʻrganishlar jarayonida qurilish ishlarini sifatli va belgilangan muddatlarda yakunlash yuzasidan masʼullarga aniq topshiriq va koʻrsatmalar berildi.
Bu kabi keng qamrovli bunyodkorlik ishlari aholi xavfsizligini taʼminlash, hududlarda huquq-tartibotni yanada mustahkamlash, shuningdek, ichki ishlar organlari faoliyati samaradorligini oshirishga xizmat qiladi.
Andijon viloyati IIB Axborot xizmati