Andijon viloyati IIBda Ichki ishlar vazirligining navbatdagi Hayʼat yigʻilishida belgilangan vazifalar ijrosi hamda jinoyatchilikka qarshi kurashish natijalari tanqidiy muhokama qilindi
2026-05-07 09:00:00 / Yangiliklar
Andijon viloyati ichki ishlar boshqarmasida viloyat IIB boshligʻi polkovnik Sanjar Djabarov raisligida Ichki ishlar vazirligining navbatdagi Hayʼat yigʻilishida belgilangan ustuvor vazifalar ijrosini taʼminlash hamda joriy yilning oʻtgan 4 oyi davomida hududda jinoyatchilik va huquqbuzarliklarning oldini olish borasida amalga oshirilgan ishlar yuzasidan tanqidiy muhokama yigʻilishi boʻlib oʻtdi.
Yigʻilishda boshqarma boshligʻining oʻrinbosarlari, sohaviy xizmatlar rahbarlari, shahar-tuman ichki ishlar organlari boshliqlari va masʼul xodimlari ishtirok etdi.
Tadbirda dastlab Ichki ishlar vazirligi Hayʼat yigʻilishida koʻtarilgan dolzarb masalalar, aniqlangan tizimli kamchiliklar hamda ularni bartaraf etish boʻyicha belgilangan aniq vazifalar ijrosi tanqidiy ruhda koʻrib chiqildi. Masʼul rahbarlarga belgilangan vazifalarni oʻz vaqtida va sifatli bajarish boʻyicha aniq topshiriqlar berildi.
Shuningdek, joriy yilning oʻtgan davrida viloyatdagi kriminogen vaziyat atroflicha tahlil qilinib, jinoyatlarning turlari, sodir etilish omillari, ularga imkon yaratayotgan sabab va shart-sharoitlar chuqur oʻrganildi. Alohida eʼtibor jinoyatlarning oldini olish, ularni barvaqt profilaktika qilish, ayniqsa, mahalla va xonadon kesimida manzilli ishlarni samarali tashkil etish masalalariga qaratildi.
Muhokamalar davomida ayrim hududlarda profilaktika ishlari talab darajasida yoʻlga qoʻyilmagani, masʼul xodimlar tomonidan shaxsiy javobgarlik yetarlicha his etilmayotgani, natijada ayrim turdagi jinoyatlarning ortishiga sharoit yaratilayotgani keskin tanqid qilindi.
Yigʻilishda profilaktika inspektorlari faoliyatini yanada kuchaytirish, tezkor-qidiruv va tergov xizmatlari oʻrtasidagi hamkorlikni mustahkamlash, axborot texnologiyalari imkoniyatlaridan samarali foydalanish, jamoatchilik bilan ishlashni yangi bosqichga olib chiqish orqali jinoyatchilikni jilovlash boʻyicha aniq vazifalar belgilab berildi.
Shu bilan birga, har bir mahallada xavfsiz muhit yaratish borasidagi profilaktik ishlarni yanada jadallashtirish, huquqbuzarlikka moyil shaxslar bilan individual ishlash, oilalarda ijtimoiy-maʼnaviy muhitni sogʻlomlashtirish orqali jinoyatlarning oldini olish samaradorligini oshirish zarurligi taʼkidlandi.
Yigʻilish yakunida viloyat IIB boshligʻi tomonidan barcha rahbar va masʼul xodimlarga Hayʼat yigʻilishida berilgan topshiriqlar ijrosini soʻzsiz taʼminlash, xizmat intizomini mustahkamlash, jinoyatchilikka qarshi kurashish samaradorligini yanada oshirish yuzasidan qatʼiy topshiriqlar berilib, kelgusida amalga oshirilishi lozim boʻlgan vazifalar belgilab olindi.
Andijon viloyati IIB Axborot xizmati