Interpolning Oʻzbekistondagi Milliy markaziy byurosining xorijiy hamkorlar bilan yaqin hamkorligi qidiruvdagi shaxsni Peru Respublikasidan ekstraditsiya qilish imkonini berdi
2026-05-06 08:10:00 / Yangiliklar
Respublika huquqni muhofaza qiluvchi organlari tomonidan Interpol kanallari orqali qidiruvga berilgan fuqaro Perudan Oʻzbekistonga olib kelindi. Interpolning Oʻzbekiston va Peru Milliy markaziy byurolarining muvofiqlashtirilgan harakatlari, shuningdek, Oʻzbekiston Respublikasi Bosh prokuraturasi Xalqaro-huquqiy departamenti hamda Peru Respublikasi Adliya vazirligining faol koʻmagi natijasida Oʻzbekiston Respublikasi Jinoyat kodeksining 168-moddasi 4-qismi bilan jinoiy javobgarlikka tortilishi belgilangan oʻta yirik miqdordagi firibgarlikni sodir etganligi uchun qidiruvda boʻlgan Turkiya Respublikasi fuqarosi ekstraditsiya qilindi.
Gumonlanuvchi Peru Respublikasi hududida tergov organlaridan yashirinib yurgan va xalqaro qidiruv doirasida qoʻlga olingan.
Ekstraditsiya Toshkent va Lima Milliy markaziy byurolari xodimlarining hamkorlikdagi tezkor-qidiruv tadbirlari hamda ekstraditsiya jarayonida tranzit oʻtgan Fransiya va BAA vakolatli organlarining xalqaro huquq doirasida koʻrsatgan yordami tufayli amalga oshirildi.
Mazkur holat transmilliy jinoyatchilikka qarshi kurashishda Interpol Xalqaro jinoiy politsiya tashkilotiga aʼzo davlatlar oʻrtasidagi ikki va koʻp tomonlama hamkorlik samaradorligini tasdiqlaydi.
Ekstraditsiya qilingan shaxs keyingi protsessual harakatlarni oʻtkazish hamda Oʻzbekiston Respublikasi qonunchiligiga muvofiq jinoiy javobgarlikka tortish uchun Interpol Milliy markaziy byurosi va Respublika Bosh prokuraturasi xodimlari hamrohligida Oʻzbekiston Respublikasiga olib kelindi.
Interpolning Oʻzbekiston Respublikasidagi Milliy markaziy byurosi