O‘zbеkiston Rеspublikаsi Ichki ishlаr vаzirligi

Ichki ishlar vazirligi tizimida ochiqlik va shaffoflikni taʼminlash maqsadida ommaviy axborot vositalari uchun press-tadbirlar doimiy ravishda oʻtkazib kelinmoqda. Bugun ham tizim ortidagi sharafli xizmat faoliyatini koʻrsatish, amalga oshirilayotgan keng koʻlamli islohotlar haqida jamoatchilikni xabardor qilish maqsadida Toshkent shahar IIBB Qoʻriqlash boshqarmasida press-tur hamda jamoatchilik kengashining navbatdagi yigʻilishi boʻlib oʻtdi.

Press-tur davomida yigʻilganlarga Qoʻriqlash xizmatida soʻnggi yillarda amalga oshirilgan oʻzgarishlar, sohaga joriy etilayotgan zamonaviy texnologiyalar, aholi xonadonlari va obyektlar xavfsizligini taʼminlashda yoʻlga qoʻyilgan yangicha yondashuvlar hamda xizmat faoliyati haqida maʼlumot berildi.

Maʼlumki, soʻnggi yillarda sunʼiy intellekt tobora rivojlanib, xavfsizlikni taʼminlash sohasiga keng joriy etilmoqda. Qoʻriqlash departamenti tomonidan sunʼiy intellekt imkoniyatlaridan foydalangan holda yoʻlga qoʻyilgan “aqlli uy” loyihasining samarali jihatlari, tashvish tugmasi, harakatlanuvchi qurilmalar hamda signalizatsiya jamlanmalarining yangi imkoniyatlari yigʻilganlarda katta qiziqish uygʻotdi. Amaliyotda keng qoʻllanilayotgan ushbu loyihalar aholi xavfsizligini taʼminlash, tezkorlikni oshirish va favqulodda holatlarning oldini olishga xizmat qilmoqda.

Shundan soʻng Ichki ishlar vazirligi Jamoatchilik kengashining navbatdagi yigʻilishi boʻlib oʻtdi. Unda Kengash raisi Yodgor Saʼdiyev, Ichki ishlar vazirining maslahatchisi Zokirjon Almatov, kengash aʼzolari hamda ommaviy axborot vositalari ishtirok etdi. Tadbirda joriy yilning dastlabki uch oyi davomida olib borilgan xizmat faoliyati natijalari haqida axborot berildi.

Jamoatchilik kengashi aʼzolari ular orqali murojaat yoʻllayotgan yurtdoshlarimiz duch kelayotgan muammoli vaziyatlar haqida toʻxtalib, xodimlar tomonidan xizmat vazifalarini bajarishda yoʻl qoʻyilgan kamchiliklar muhokama qilindi.

Muammolarni ochiq aytish va mavjud kamchiliklarni bartaraf etishda jamoatchilik faolligini qoʻllab-quvvatlash, bu borada xodimlarning masʼuliyatini yanada oshirish boʻyicha fikrlar tinglanib, kelgusida bajarilishi zarur boʻlgan vazifalar belgilab olindi.