Buxoro shahrida xavfsiz infratuzilma va obodonlashtirish ishlari koʻzdan kechirildi
2026-05-05 09:30:00 / Yangiliklar
Buxoro viloyati hokimi boshchiligidagi viloyat IIB boshligʻi hamda soha masʼullari Buxoro shahridagi “Dilkusho” koʻchasida olib borilayotgan taʼmirlash va bunyodkorlik ishlari bilan tanishdilar.
Aholi eʼtirozlariga sabab boʻlgan salkam 2 kilometrlik mazkur yoʻlda ayni paytda kommunal tarmoqlarni yangilash, asfalt yotqizish hamda yoʻl boʻyi infratuzilmasini yaxshilash ishlari boshlangan. Oʻrganishlar davomida nafaqat obodonlashtirish, balki hududda jamoat tartibini saqlash va yoʻl harakati xavfsizligini taʼminlashga ham alohida eʼtibor qaratildi. Xususan, jinoyatchilik va huquqbuzarliklarning barvaqt oldini olish maqsadida koʻchani toʻliq kameralashtirish, zamonaviy kuzatuv moslamalarini oʻrnatib, ularni xavfsizlik tizimlariga integratsiya qilish, shuningdek, yashil hududlar va tungi yoritgichlar tashkil etish orqali aholi uchun toʻlaqonli xavfsiz muhit yaratish boʻyicha masʼullarga koʻrsatmalar berildi.
Shuningdek, rahbarlar “Shayxul olam” mahallasining “Fathobod“ koʻchasida joylashgan koʻp qavatli uylarning fasad qismini taʼmirlash boʻyicha tayyorlangan namunaviy loyiha taqdimotini ham koʻzdan kechirdilar.
Jarayonda shahardagi hududlar qiyofasini yangilashda “Xavfsiz mahalla” va “Xavfsiz yoʻlak” tamoyillariga qatʼiy amal qilish, koʻp qavatli uylar atrofiga intellektual videokuzatuv kameralarini oʻrnatish va tunu kun xavfsizlikni taʼminlash orqali odamlarning tinch hamda farovon yashash sharoitlarini yanada yaxshilash masalalari yuzasidan mutasaddilarga tegishli topshiriqlar berildi.
Ahamiyatlisi shundaki, hududlarda amalga oshirilayotgan bu kabi keng koʻlamli obodonlashtirish, tizimli profilaktika hamda raqamlashtirish ishlari bevosita davlatimiz rahbarining PQ-1 va PQ-2-son qarorlari talablari asosida, aholi xavfsizligi va osoyishtaligini kafolatlash maqsadida olib borilmoqda.
Buxoro viloyati IIB Axborot xizmati