Qidiruvda boʻlgan uch nafar shaxs chet elda qoʻlga olinib, Interpol saʼy-harakatlari natijasida Oʻzbekistonga qaytarildi
2026-05-04 16:00:00 / Yangiliklar
Interpol yoʻnalishidagi samarali ishlarning yana bir natijasi: Interpolning Oʻzbekiston Respublikasidagi Milliy markaziy byurosi tomonidan amalga oshirilgan harakatlar natijasida respublika huquqni muhofaza qilish organlari tashabbusi bilan xalqaro qidiruvda boʻlgan uch nafar fuqaroning qaytarilishi taʼminlandi.
Ulardan ikki nafari firibgarlikda, yana biri odam savdosi bilan bogʻliq jinoyatni sodir etganlikda ayblanmoqda.
Jinoyat sodir etgandan soʻng ular Birlashgan Arab Amirliklari hududiga qochib ketishgan.
Interpol Milliy markaziy byurosining maqsadli faoliyati, xorijiy hamkorlar bilan doimiy hamkorligi va Interpolning xalqaro qidiruv mexanizmlarini ishga solishi tufayli ularning turgan joyi aniqlandi.
Interpolning Abu-Dabidagi Milliy markaziy byurosi koʻmagida uchalasi ham qoʻlga olindi.
Qidiruvdagilarni topshirish turli huquqiy mexanizmlar, jumladan, Interpolning Toshkent va Abu-Dabi Milliy markaziy byurolari oʻrtasida erishilgan maxsus kelishuvlar doirasida amalga oshirildi.
Mazkur shaxslar Oʻzbekiston Interpol Milliy markaziy byurosi xodimlari hamrohligida qonunchilikka muvofiq javobgarlikka tortish uchun Islom Karimov nomidagi Toshkent xalqaro aeroportiga olib kelindi.
Shuni aniq taʼkidlash lozimki, chet elda yashirinishga urinish javobgarlikdan ozod qilmaydi.
Interpolning Oʻzbekiston Respublikasidagi Milliy markaziy byurosi