Oʻzbekiston Interpol Milliy markaziy byurosi qidiruvdagi shaxsning ekstraditsiyasini taʼminladi
2026-05-03 11:10:00 / Yangiliklar
Interpol yoʻnalishidagi tizimli ishlar doirasida Oʻzbekiston Respublikasi Interpol Milliy markaziy byurosi xorijiy hamkorlar bilan oʻzaro amalga oshirgan saʼy-harakatlari natijasida xalqaro qidiruvda boʻlgan Oʻzbekiston Respublikasi fuqarosini ekstraditsiya qildi.
Qidiruvdagi shaxs Oʻzbekiston MMB Interpol kanallari orqali oʻta yirik miqdordagi firibgarlikni sodir etganligi uchun qidiruvga berilgan edi. Uning joylashgan manzilini aniqlash va qoʻlga olishni tashkil etish maqsadida Interpolning Oʻzbekistondagi Milliy markaziy byurosi xorijiy davlatlarning Milliy markaziy byurolari bilan doimiy axborot almashinuvi va harakatlarni muvofiqlashtirishni taʼminladi.
Interpolning Tbilisi shahridagi Milliy markaziy byurosi bilan oʻtkazilgan muvofiqlashtirilgan tadbirlar natijasida qidiruvdagi shaxs Gruziya hududida aniqlanib, qoʻlga olindi.
Xalqaro qidiruvni eʼlon qilishdan tortib, ekstraditsiyani amalda ijro etishgacha boʻlgan barcha bosqichlarda Interpolning Oʻzbekistondagi Milliy markaziy byurosi ushbu jarayonni tashkiliy-huquqiy va axborot jihatdan amalga oshirdi.
Gruziya Adliya vazirligi Oʻzbekiston Respublikasi Bosh prokuraturasining iltimosnomasini qanoatlantirgach, ekstraditsiya qilingan shaxs Interpolning Oʻzbekistondagi Milliy markaziy byurosi xodimlari bevosita ishtirokida keyingi protsessual harakatlarni oʻtkazish hamda Oʻzbekiston Respublikasi qonunchiligiga muvofiq javobgarlikka tortish uchun Toshkent shahriga olib kelindi.
Ushbu natija Interpolning xalqaro vositalaridan foydalanishning yuksak samaradorligi hamda Interpolning Oʻzbekiston Respublikasidagi Milliy markaziy byurosi jazo muqarrarligini taʼminlash va transmilliy jinoyatchilikka qarshi kurashishda muhim oʻrin tutishining yaqqol tasdigʻidir.
Interpolning Oʻzbekiston Respublikasidagi Milliy markaziy byurosi