Ichki ishlar organlari xodimlarining maʼnaviy-maʼrifiy salohiyati mustahkamlanmoqda
2026-05-03 11:05:00 / Yangiliklar
Yurtimizda yosh avlodni maʼnaviy barkamol, vatanparvar va bilimli etib tarbiyalash davlat siyosatida ustuvor yoʻnalishlardan biri hisoblanadi. Shu maqsadda ichki ishlar organlari tomonidan yoshlarni milliy va maʼnaviy merosimiz bilan yaqindan tanishtirishga qaratilgan maʼrifiy tadbirlar izchil amalga oshirilmoqda.
Xususan, IIV Maʼnaviy-maʼrifiy ishlar va kadrlar bilan taʼminlash departamenti tomonidan tizim xodimlari, sohaviy xizmat vakillari hamda akademik litsey oʻquvchilari uchun mazkur markazga muntazam tashriflar tashkil etilmoqda.
Jumladan, ichki ishlar organlari xodimlari, akademik litsey oʻquvchilari hamda kursantlar uchun Oʻzbekistondagi Islom sivilizatsiyasi markaziga tashriflar yoʻlga qoʻyilgan. Ushbu markaz yurtimizning boy tarixi, islom sivilizatsiyasi taraqqiyoti hamda buyuk ajdodlarimizning jahon ilm-faniga qoʻshgan ulkan hissasini oʻzida mujassam etgan muhim maʼnaviy maskan hisoblanadi.
Tashrif davomida ishtirokchilar markaz ekspozitsiyalari bilan yaqindan tanishib, noyob qoʻlyozmalar, tarixiy eksponatlar va zamonaviy interaktiv koʻrgazmalar orqali milliy merosimiz haqida batafsil maʼlumotlarga ega boʻldilar. Ayniqsa, Imom al-Buxoriy, Muhammad al-Xorazmiy va Amir Temur kabi buyuk allomalarning hayoti va ilmiy merosi yoshlarda katta qiziqish uygʻotdi.
Tadbir doirasida ochiq muloqotlar tashkil etilib, yoshlarning kasbiy yoʻnalishi, jamiyatdagi oʻrni va masʼuliyatiga oid dolzarb masalalar muhokama qilindi. Ishtirokchilar oʻzlarini qiziqtirgan savollarga javob oldilar hamda fikr-mulohazalarini erkin bildirdilar.
Shuningdek, yoshlarga Prezidentimiz muallifligidagi “Hozirgi zamon va Yangi Oʻzbekiston” kitobi hamda ichki ishlar vaziri imzosi tushirilgan tabrik-murojaatnomalar tantanali ravishda topshirildi.
Mazkur eʼtibor yoshlarda yuksak ruhiy koʻtarinkilik uygʻotib, ularning bilim olishga boʻlgan intilishini yanada oshirdi. Taʼkidlash joizki, bunday maʼnaviy-maʼrifiy tadbirlar yoshlar ongida Vatanga sadoqat, qonuniylik va adolat tamoyillariga hurmat tuygʻularini mustahkamlashda muhim ahamiyat kasb etmoqda.
Eʼtiborlisi, bugungi kunga qadar oʻtkazilgan tadbirlar doirasida hududiy va tarkibiy boʻlinmalardan 2 ming nafardan ortiq ichki ishlar organlari xodimlari hamda yoshlar qamrab olindi. Mazkur yoʻnalishdagi ishlar izchil ravishda davom ettirilmoqda.
IIV Maʼnaviy-maʼrifiy ishlar va kadrlar bilan taʼminlash departamenti Axborot xizmati