Oʻzbekiston Respublikasi Ichki ishlar vazirligi vakili EXHT Odam savdosiga qarshi kurashish Alyansining yuqori darajadagi 26-konferensiyasida ishtirok etdi
2026-05-02 18:10:00 / Yangiliklar
Joriy yilning 20-21-aprel kunlari Oʻzbekiston Respublikasi delegatsiyasi Venada (Avstriya) boʻlib oʻtgan Yevropada xavfsizlik va hamkorlik tashkilotining (EXHT) Odam savdosiga qarshi kurashish Alyansining “Majburiy jinoyatchilikning oʻsishi: xavfsizlik tizimidagi koʻrinmas hududni bartaraf etish“ mavzusidagi 26-konferensiyasida ishtirok etdi.
Konferensiyaning asosiy maqsadi – insonlarni jinoiy faoliyatga jalb qilish orqali ulardan foydalanish maqsadidagi odam savdosi muammosi koʻlami va tendensiyalarini tahlil qilish, jumladan raqamli texnologiyalar va moliyaviy izlar, jinoiy tarmoqlar tomonidan qurbonlarni tanlashda qoʻllanilayotgan murakkablashib borayotgan usullarni koʻrib chiqish.
Alyans konferensiyasida EXHTga aʼzo 57 ta davlat va hamkorlik boʻyicha 11 ta hamkor, Alyans hamkori boʻlgan yirik xalqaro va nodavlat tashkilotlar vakillari, shuningdek, fuqarolik jamiyati va ommaviy axborot vositalari vakillari hamda odam savdosi bilan bogʻliq vaziyatni boshdan kechirgan ekspertlar ishtirok etdi.
Konferensiyada Oʻzbekistonda odam savdosi va bolalarni jinoiy faoliyatga jalb qilishning oldini olish boʻyicha amalga oshirilayotgan chora-tadbirlar haqida maʼlumot berildi. Xususan, 2025-yilda odam savdosi bilan bogʻliq jinoyatlar uchun jazo choralari kuchaytirilgani, Oʻzbekiston Respublikasining Odam savdosiga qarshi kurashish konsepsiyasi va Oʻzbekiston Respublikasining Odam savdosiga qarshi kurashish konsepsiyasini amalga oshirish boʻyicha “Yoʻl xaritasi“ qabul qilingani, Giyohvandlik va narkojinoyatlarga qarshi kurashish boʻyicha milliy strategiyasi doirasida voyaga yetmaganlarni giyohvandlik jinoyatlariga jalb qilish ogʻir jinoyat deb topilgani, shuningdek, bolalarga nisbatan jinsiy jinoyatlar uchun jazo choralari kuchaytirilgani taʼkidlandi.
Tadbir ishtirokchilari oʻz ixtiyoriga qarshi jinoiy faoliyatga jalb qilingan shaxslarga nisbatan “javobgarlikka tortilmaslik“ tamoyilini qoʻllash, ularni erta aniqlash va tizimli ijtimoiy reintegratsiya qilish masalalari boʻyicha tajriba almashdi.
Anʼanaviy tarzda 10-yil davomida oʻtkazib kelinayotgan Odam savdosiga qarshi kurashish Alyansning bu yilgi konferensiyasi yangi global xavf-xatarlarga nisbatan samarali mexanizmlarni ishlab chiqish, innovatsion yondashuvlarni tobora kuchaytirilgan holda davlatlararo hamkorlikni mustahkamlashga xizmat qildi.