IIV Akademiyasida ichki ishlar organlarida raqamlashtirish jarayonlariga bagʻishlangan taqdimot oʻtkazildi
2026-05-02 15:10:00 / Yangiliklar
Bugungi kunda ichki ishlar organlari tizimida raqamlashtirishga alohida eʼtibor qaratilmoqda. Bu borada ayniqsa poytaxtimizda samarali yondashuvlar tatbiq qilingan.
IIV Akademiyasida boʻlib oʻtgan taqdimot jarayonida Toshkent shahar Ichki ishlar bosh boshqarmasi boshligʻi Ravshan Sultanxodjayev mazkur yoʻnalishda amalga oshirilayotgan keng qamrovli chora-tadbirlar haqida maʼlumot berdi.
Sohaviy xizmatlar, tuman ichki ishlar organlari rahbarlari, fakultet va kafedralar boshliqlari, magistratura tinglovchilari ishtirok etgan tadbirda raqamlashtirishda erishilayotgan natijalar hamda kelgusidagi ustuvor yoʻnalishlar tahlil qilindi.
Taʼkidlab oʻtilganidek, raqamli yechimlar davlat organlari faoliyatining muhim mezoniga aylanib bormoqda. Bu borada ichki ishlar tizimida ham salmoqli ishlar qilinmoqda.
Innovatsion tizimlarning yoʻlga qoʻyilgani boshqaruv samaradorligini oshirish, ochiqlik va shaffoflikni taʼminlash, ehtimoliy korrupsiya holatlariga barham berishga xizmat qilmoqda.
Ayniqsa aholi murojaatlari bilan ishlash, jamoat xavfsizligini taʼminlash, jinoyatchilikka qarshi kurashish, kriminogen vaziyatni prognoz qilish, tezkor qidiruv va tergov tadbirlari sifatini oshirishda raqamli platformalar imkoniyatlari kengayib bormoqda.
Tadbirda raqamlashtirish istiqbollari aniq raqamlar va statistik maʼlumotlar orqali tushuntirib oʻtildi.
Xavfsiz muhitni shakllantirish maqsadida hududlarga joriy qilinayotgan tajribalar, “Raqamli Oʻzbekiston – 2030” strategiyasi doirasida belgilab olingan vazifalar, mazkur yoʻnalishda yechimini kutayotgan masalalar muhokama qilindi.
Boshqaruvni raqamlashtirishning afzalliklari borasida magistratura tinglovchilariga tavsiyalar berildi.
IIV Akademiyasi Axborot xizmati