O‘zbеkiston Rеspublikаsi Ichki ishlаr vаzirligi

Toshkent shahar IIBBda Ichki ishlar vazirining birinchi oʻrinbosari – Tezkor-qidiruv departamenti boshligʻi, general-mayor Botir Qudratxoʻjayev, Ichki ishlar vazirining komplayens va korrupsiyaga qarshi ichki nazorat boʻyicha oʻrinbosari, polkovnik Rustam Mirzayev, Bosh boshqarma boshligʻi, polkovnik Ravshan Sultanxodjayev, hududiy tuzilmalar boshliqlari, ularning oʻrinbosarlari, sohaviy xizmatlar boshliqlari va boshqa mutasaddilar ishtirokida tahliliy-tanqidiy yigʻilish boʻlib oʻtdi. Unda joriy yilning 3 oyi davomida poytaxt hududida jinoyatchilikka qarshi kurashish, huquqbuzarliklarning oldini olish, mahallalarda huquqbuzarliklarni barvaqt aniqlash orqali xavfsizlikni taʼminlash, fuqarolarning huquq va manfaatlarini himoya qilish borasida amalga oshirilgan ishlar sarhisob qilindi.

Prezidentimizning joriy yil boshida qabul qilgan qarorida belgilab berilgan mahallalarda ishlash, jinoyatning asl kelib chiqish sabablarini aniqlash, ularni bartaraf etishga kompleks yondashish, mahalla, mutasaddi tashkilotlar, fuqarolar faolligini yoʻlga qoʻyish borasida qatʼiy soʻrov tizimi belgilab berilgan edi. Bosh boshqarma boshligʻi amalga oshirilgan ijobiy ishlarga toʻxtalar ekan, qarorning mazmun-mohiyati chuqur oʻrganilib, ijrosini samarali taʼminlash natijasida poytaxt hududida umumiy jinoyatchilikning 2,5 foizga kamayishiga erishilgani (6 576 ta jinoyat), oldini olish mumkin boʻlgan jinoyatlar esa 10,7 foizga kamaygani qayd etdi. Maʼruzachi tomonidan taʼkidlanganidek, IIO xodimlarining shaxsiy tashabbuslari bilan aniqlanadigan jinoyatlar 1 915 tani tashkil qilib, 15 foizga yaxshilangan.

Giyohvandlikka qarshi kurashish yoʻnalishida olib borilgan tezkor tadbirlar natijasida 120 kg 260 gr giyohvandlik vositalari hujjatlashtirib olinib, aholi orasida tarqalishi toʻxtatib qolingan.

Tergov va sud idoralaridan qochib yashirinib yurgan 338 nafar qidiruvdagi shaxslar ushlanib, jinoyat uchun javobgarlik muqarrarligi prinsipi taʼminlangan.

Poytaxt hududida terrorizm va ekstremizmga qarshi kurashish borasida, hamkor xizmatlar bilan birgalikda tezkor-profilaktik tadbirlar amalga oshirilishi natijasida 67 ta jinoiy holat aniqlanib, 76 nafar shaxslar javobgarlikka tortilgan.

Lekin bu yutuqlar xotirjamlikka asos boʻlolmasligi, zotan poytaxtning barcha tumanlarida ijobiy oʻzgarishlar talab darajasida kuzatilmaganligi taʼkidlandi. Amalga oshirilgan profilaktik ishlar natijadorligi va yoʻl qoʻyilgan kamchiliklar har bir tuman kesimida tahlil etilib, tuman IIO FMB ayrim rahbarlari faoliyatiga haqli eʼtirozlar bildirilib, aksariyat sohalarda yoʻl qoʻyilayotgan kamchiliklar koʻrsatib oʻtildi.

Shu bilan birga hisobot davrida xodimlar tomonidan xizmat va ijrochilik intizomini buzish holatlariga toʻxtalib oʻtilib, ichki ishlar organlari tizimida tashkil etilgan yangi komplayens xizmati faoliyati haqida yigʻilganlarga maʼlumot berildi.

Xususan, joriy yilning oʻtgan davrida faoliyati davomida qator jiddiy kamchiliklarga yoʻl qoʻygan rahbar va masʼullarga nisbatan intizomiy choralar qoʻllanilganligi maʼlum qilindi.

Shuningdek, yigʻilish davomida 2 nafar rahbarlar egallab turgan lavozimiga loyiq yoki noloyiqligi yuzasidan xizmat tekshiruvi tayinlanib, 18 nafar rahbar va masʼullar intizomiy jazoga tortildi.

Shular barobarida xizmat vazifalarini sidqidildan bajarib, hamkasblariga oʻrnak boʻlib kelayotgan xodimlarning xizmatlari munosib ragʻbatlantirildi. Yigʻilish soʻngida aniqlangan kamchiliklarni bartaraf etish yuzasidan rahbarlarga, soha masʼullariga tegishli koʻrsatmalar berilib, kriminogen vaziyatni barqarorlashtirish boʻyicha istiqboldagi ustuvor vazifalar belgilab olindi.

Toshkent shahar IIBB Axborot xizmati