Qashqadaryo viloyati Chiroqchi tumanida jamoat xavfsizligini taʼminlash borasida amaliy tadbirlar va tahliliy yigʻilish oʻtkazildi
2026-04-30 12:00:00 / Yangiliklar
Chiroqchi tumanida aholi osoyishtaligini taʼminlash, jinoyatchilikning barvaqt oldini olish hamda hududni raqamlashtirish yoʻnalishida keng koʻlamli ishlar amalga oshirildi. Mazkur jarayonlar avval joylarda olib borilgan amaliy harakatlar, soʻngra ularning natijadorligi va samaradorligini chuqur tahlil qilishga bagʻishlangan tanqidiy ruhdagi yigʻilish shaklida tashkil etildi. Asosiy eʼtibor aynan tahliliy yigʻilish jarayonida aniqlangan muammo va kamchiliklarni bartaraf etish masalalariga qaratildi.
Dastlab tuzilgan maxsus ishchi guruh tomonidan tumanning kriminogen vaziyatini jilovlash boʻyicha bir qator muhim chora-tadbirlar amalga oshirildi:
Hududdagi barcha obyektlar, savdo nuqtalari, bozorlar hamda aholining gavjum jamoat joylari bosqichma-bosqich toʻliq kamerallashtirildi. Oʻrnatilgan zamonaviy kuzatuv tizimlari huquqbuzarliklarni masofadan aniqlash, jinoyatlarning oldini olish hamda ularni “issiq izidan” fosh etishda muhim samaradorlikni taʼminlamoqda.
Bugungi kunda dolzarb boʻlib borayotgan kiberjinoyatchilikning oldini olish maqsadida ishchi guruh tomonidan “xonadonbay” tizimida keng qamrovli profilaktik tadbirlar oʻtkazildi. Aholi gavjum joylar va fuqarolarning yashash xonadonlarida kiberfiribgarlik holatlaridan ogoh etuvchi tushuntirish ishlari olib borilib, fuqarolarning huquqiy hamda axborot xavfsizligi boʻyicha bilimlari oshirildi.
Amalga oshirilgan ushbu amaliy ishlar yakunida Viloyat IIB boshligʻi, polkovnik Abduvoxid Ismoilov huzurida tuman IIB shaxsiy tarkibi ishtirokida keng qamrovli tahliliy yigʻilish oʻtkazildi. Yigʻilishda bajarilgan ishlar atroflicha sarhisob qilinib, natijadorlik tanqidiy nuqtai nazardan tahlil etildi, mavjud kamchiliklar ochiq muhokama qilindi.
Fuqarolardan kelib tushayotgan murojaatlarni oʻz vaqtida va sifatli koʻrib chiqish, ijtimoiy profilaktika tizimidan samarali foydalanish boʻyicha aniq topshiriqlar berildi. Xodimlarning xizmat intizomi, kiyinish madaniyati hamda fuqarolar bilan muomala madaniyatiga alohida eʼtibor qaratilishi lozimligi taʼkidlandi.
Shuningdek, jinoyatlarni erta aniqlash va oldini olishda boshqa huquqni muhofaza qiluvchi organlar hamda keng jamoatchilik bilan hamkorlikni yanada yangi bosqichga olib chiqish zarurligi uqtirildi.
Yigʻilish yakunida berilgan topshiriqlarni oʻz vaqtida va sifatli ijro etish, profilaktik tadbirlarni yanada kuchaytirish boʻyicha aniq koʻrsatmalar berilib, Chiroqchi tumanini xavfsiz hududga aylantirishga qaratilgan kelgusi “yoʻl xaritasi” belgilab olindi.
Qashqadaryo viloyati IIB Axborot xizmati