Ichki ishlar vazirligi rahbariyati boshchiligida IIV Transport va turizm obyektlarida xavfsizlikni taʼminlash departamentida 3 oylik faoliyati sarhisob qilindi
2026-04-28 14:00:00 / Yangiliklar
Ichki ishlar vaziri oʻrinbosari, general-mayor Mirzaraximov Baxodir Yuldoshevich tomonidan IIV Transport va turizm obyektlarida xavfsizlikni taʼminlash departamentining soʻnggi uch oylik faoliyatiga bagʻishlangan yigʻilish oʻtkazildi.
Yigʻilish davomida departament tomonidan amalga oshirilgan ishlar, erishilgan natijalar hamda yoʻl qoʻyilgan kamchiliklar atroflicha tahlil qilindi.
Xususan, aeroportlar, temir yoʻl vokzallari va metro tizimida jamoat xavfsizligini taʼminlash, huquqbuzarliklarning oldini olish, fuqarolar va xorijiy mehmonlar uchun qulay va xavfsiz muhit yaratish borasida qator amaliy ishlar bajarilgani taʼkidlandi.
Shuningdek, transport infratuzilmasining ushbu muhim boʻgʻinlarida zamonaviy axborot texnologiyalarini joriy etish, videokuzatuv tizimlarini kengaytirish, profilaktik tadbirlarni kuchaytirish orqali jinoyatchilikni barvaqt aniqlash va bartaraf etish boʻyicha samarali ishlar olib borilgani qayd etildi.
Yigʻilishda departament xodimlarining xizmat intizomi, kasbiy tayyorgarligi va masʼuliyatini oshirish masalalariga ham alohida eʼtibor qaratildi. Aeroport, temir yoʻl va metro obyektlarida xizmat olib borayotgan xodimlarning tezkorligi va hushyorligini oshirish ustuvor vazifa sifatida belgilandi.
Yigʻilish yakunida general-mayor Mirzaraximov Baxodir Yuldoshevich tomonidan kelgusida amalga oshirilishi lozim boʻlgan ustuvor vazifalar belgilab berildi. Jumladan, transport va turizm sohalarida, ayniqsa aeroport, temir yoʻl va metro obyektlarida xavfsizlikni taʼminlash tizimini yanada takomillashtirish, aholi va mehmonlar uchun xavfsiz muhitni mustahkamlash, huquqbuzarliklarning oldini olish boʻyicha manzilli chora-tadbirlarni kuchaytirish zarurligi alohida taʼkidlandi.
Shu bilan birga, masʼul rahbar va xodimlarga yoʻl qoʻyilgan kamchiliklarni qisqa muddatlarda bartaraf etish, xizmat samaradorligini oshirish hamda qonun ustuvorligini taʼminlash yuzasidan aniq topshiriqlar berildi.
Mazkur sarhisob yigʻilishi departament faoliyatini tanqidiy-tahliliy asosda baholash, kelgusidagi vazifalarni belgilash va sohada xavfsizlikni yanada mustahkamlashga xizmat qilishi qayd etildi.
IIV Transport va turizm obyektlarida xavfsizlikni taʼminlash departamenti Axborot guruhi